Jyl basynan beri 600-den astam páter urysy ustaldy – ІІM

NUR-SULTAN. QazAqparat – 2022 jyl bastalǵaly beri elimiz boıynsha 600-den astam páter tonaýshy ury ustaldy. Bul týraly QR ІІM Krımınaldyq polıtsııa departamentiniń asa mańyzdy ister jónindegi aǵa jedel ýákili Saǵyndyq Jantemirov málim etti, dep habarlaıdy QazAqparat tilshisi.

«Páter urlyǵy nemese úıdi tonaý qylmysymen kúresý maqsatynda bizdiń mınıstrlik zańnamany jetildirip, birqatar praktıkalyq shara qabyldap jatyr. Taldaý nátıjesi kórsetip otyrǵandaı páter urylarynyń deni buryn isti bolǵan nemese jasaǵan urlyǵy keshirilgen jandar. Osy oraıda 2018-2019 jyldary elimizdiń qylmystyq kodeksine ózgerister men tolyqtyrýlar engizildi. Oǵan sáıkes páter urlyǵyn jasaý qaıtalansa aýyr qylmys bolyp esepteledi. Sol sııaqty aıyptynyń kinási dáleldengen jaǵdaıda 7 jylǵa deıin bas bostandyǵynan aıyrylady», - dedi Saǵyndyq Jantemirov ІІM-de ótken baspasóz máslıhatynda.

Onyń aıtýynsha, páter urlyǵynyń aldyn alý men qylmys barysyn ashýda beınebaqylaý kameralary taptyrmas qural.

«Búginde elimiz boıynsha kópqabatty úı aýlalarynda 68 myńnan astam beınebaqylaý kamerasy ornatylǵan. Odan bólek 22 myńnan astam beınebaqylaý kamerasyn turǵyndardyń ózderi ornatty. Qabyldanyp jatqan sharalardyń nátıjesinde atalǵan qylmys túrimen kúres óz nátıjesin berip jatyr. Jyl basynan beri el aýmaǵynda 600-den astam páter urysy ustaldy. Sonymen qatar 29 qylmystyq top quryqtaldy. Onyń ishinde 36 kóshpeli ury bar. ıAǵnı ár qalaǵa baryp páter tonaýshylar», - deıdi ol.