Jyl basynan beri 6 myńnan astam qaraǵandylyq jumysqa ornalasty

QARAǴANDY. QazAqparat – Bıylǵy jyldyń birinshi toqsanynda Qaraǵandy oblysynda 6058 adam jumysqa ornalasty. Óńirdegi jumyssyzdyq deńgeıi - 4,5%. Bul respýblıkalyq kórsetkishten (4,9 %) tómen. Óńirdiń jumyspen qamtý qyzmetine birinshi toqsanda 7136 turǵyn júgindi, dep habarlaıdy QazAqparat tilshisi.

Kásipkerlikti damytýdyń 2021–2025 jyldarǵa arnalǵan ulttyq jobasy aıasynda 6058 adam jumyspen qamtyldy.

Onyń ishinde 3,3 myń úmitker bos oryndarǵa joldama aldy.

«Áleýmettik jumys oryndaryna – 294, qoǵamdyq jumystarǵa – 2310. Jastar tájirıbesinen ótý múmkindigin óńirdiń 118 turǵyny paıdalandy. «Urpaqtar kelisimsharty» jobasy boıynsha eki jas maman sheberligin arttyra aldy. «Birinshi jumys orny» jobasy aıasynda 20 adam jumysqa ornalastyryldy. Bul baǵdarlamany 29 jastan aspaǵan jastar paıdalana alady. Mysaly, jumys tájirıbesi joq túlekter, jumyspen qamtý ortalyǵynda tirkelgen-tirkelmegenine qaramastan jumyssyz dep tanylǵan jastar, sonyń ishinde NEET sanatyndaǵylar», – dep atap ótti jumyspen qamtýdy úılestirý jáne áleýmettik baǵdarlamalar basqarmasynyń basshysy Ásem Júnispekova.

Sondaı-aq, óńirde «Urpaqtar kelisimsharty» jobasy júzege asyp jatyr.

Ol zeınet jasyna tolǵan jumys istep júrgen jumyskerdi keıinnen aýystyra otyryp, jas mamandardy jumysqa ornalastyrýǵa baǵyttalǵan.

Osy jyldyń qańtar aıynan bastap QR Prezıdenti Qasym-Jomart Toqaevtyń tapsyrmasy boıynsha «Jastar praktıkasy» jáne «Alǵashqy jumys orny» jobalaryna qatysý uzaqtyǵy men eńbekaqy mólsheri ulǵaıtyldy.

«Jastar tájirıbesi» alty aıdan bir jylǵa deıin sozylady, jalaqysy 30 AEK (91 890 ₸). «Birinshi jumys orny» jobasyn iske asyrý sheńberinde 30 AEK jalaqymen 12 aıdan 18 aıǵa deıin jumysqa ornalasýǵa kepildik berilgen.

Zeınet jasyna jaqyndaǵan jumyssyz adamdar úshin «Kúmis jas» jańa jobasy ázirlendi. Bıyl ony 534 adam paıdalana alady.

Bul rette memleket jyl boıy jalaqyny sýbsıdııalaıdy.

Aı saıynǵy sýbsıdııa mólsheri – belgilengen jalaqynyń 50 paıyzy, biraq salyqty, mindetti áleýmettik aýdarymdardy, paıdalanylmaǵan eńbek demalysy men banktik qyzmetter úshin ótemaqylardy eskere kele 30 AEK-ten aspaıdy.

«Búginde jumys berýshiler men zeınetkerlik jasqa jaqyndaǵan tulǵalardy tartý boıynsha jumystar júrgizilýde. Jobany iske asyrý respýblıkalyq bıýdjetten qarjylandyrýǵa baılanysty bastalady. Jumyssyzdardy jumyspen qamtýǵa járdemdesýdiń belsendi sharalary jáne ózin-ózi jumyspen qamtyǵandardyń kásipkerlik belsendiligin arttyrý týraly aqparattandyrý úshin óńirde jyljymaly mobıldi jumysqa ornalastyrý pýnktteri jumys isteıdi», – dep qosty Ásem Júnispekova.