Jyl basynan beri 5 myńnan astam bilim berý nysany órt qaýipsizdigine tekserildi

ASTANA. QazAqparat – Tótenshe jaǵdaılar mınıstrligi Órtke qarsy qyzmet komıtetiniń tóraǵasy Nurbolat Derbisov elimizdegi bilim berý nysandaryndaǵy qaýipsizdikti tekserý nátıjesi jaıynda aıtty, dep habarlaıdy QazAqparat tilshisi.

«Bıyl 5 152 bilim berý nysanyna barý arqyly profılaktıkalyq baqylaý júrgizildi. Onyń nátıjesi boıynsha 5 151 bilim berý obektisinde 49 424 órt qaýipsizdigi talabyn buzý deregi anyqtaldy. Osy obektilerge kemshilikterdi joıý týraly nusqama berildi», - dedi N. Derbisov Májiliste mektepke deıingi jáne orta bilim berý uıymdaryndaǵy qaýipsizdik júıeleri taqyrybyna arnalǵan dóńgelek ústel otyrysynda.

Onyń aıtýynsha, bul rette órtti avtomatty túrde anyqtaý ári habarlaý júıeleriniń bolmaýy nemese isten shyǵýy, elektr qondyrǵylaryn ornatý qaǵıdalarynyń oryndalmaýy, bastapqy órt sóndirý quraldarynyń jetkiliksiz bolýy, sondaı-aq evakýatsııa joldarynyń tıisti deńgeıde qamtamasyz etilmeýi sekildi kemshilikter anyqtaldy.

Qazirgi kezde elimiz boıynsha 55 jalpy bilim beretin mektep avtomatty órt dabyly júıesimen qamtamasyz etilmegen.

«Jyl basynan beri bilim berý obektilerinde 9 órt boldy. Órt kezinde 8 oqıǵa boıynsha avtomatty órt dabyly júıesi iske qosyldy jáne bir jaǵdaıda jumys istemeı turdy», - dedi komıtet basshysy.

Budan buryn habarlanǵandaı, 2020 jylmen salystyrǵanda jedel basqarý ortalyqtaryna qosylǵan bilim berý uıymdarynyń sany 11 esege (2020 j. – 500, 2023 j. – 5 588) artty.

Oqýshylary kóp jáne iri qalalarda ornalasqan bilim berý uıymdarynda lıtsenzııalanǵan kúzettiń qamtamasyz etilmeýi anyqtaldy.