Jyl basynan beri 5,6 myńnan astam etnıkalyq qazaq qandas mártebesin aldy

NUR-SULTAN. QazAqparat - 1 maýsymdaǵy jaǵdaı boıynsha 5 679 etnıkalyq qazaq qandas mártebesin aldy, dep habarlaıdy QazAqparat Eńbek jáne halyqty áleýmettik qorǵaý mınıstrligine silteme jasap.

«Jyl basynan beri Qazaqstanǵa kelgen qandastardyń jartysynan kóbi, naqtyraq aıtqanda 68,7%-y Ózbekstannan, 10,4% – Qytaıdan, 8,8% – Túrikmenstannan, 2,6% – Mońǵolııadan jáne 9,5% basqa elderden qonys aýdarǵan. Kelgen etnıkalyq qazaqtar negizinen Almaty (31,1%), Mańǵystaý (18,8%), Túrkistan (10,3%) jáne Jambyl (6,2%) oblystaryna, sondaı-aq Almaty (6%), Nur-Sultan (6,9%) jáne Shymkent (7,9%) qalalaryna qonystandy», - delingen mınıstrlik málimetinde.

Vedomstvonyń saraptaýynsha, eńbekke qabiletti jastaǵy etnıkalyq qonys aýdarýshylar - 63,2%, eńbekke qabiletti jastan kishi qonys aýdarýshylar - 22,8% jáne zeınetkerler - 14%.

Al, eńbekke qabiletti jastaǵy qandastardyń 11,4%-y – joǵary, 40,3%-y – orta kásibı, 46,6%-y – jalpy orta bilimdi jáne 1,7%-nyń bilimi joq.

Aıta ketsek, 1991 jyldan beri respýblıkaǵa 1 mln 93,5 myń etnıkalyq qazaq oralǵan.

Buǵan deıin habarlanǵanyndaı, Qazaqstan Respýblıkasynyń aýmaǵyna buryn turǵan jáne qaıta kelgen etnıkalyq qazaqtar eGov.kz portalynda qandas mártebesin alýǵa nemese ony uzartýǵa ótinim bere alady.