Jyl basynan beri 46 mlrd teńgege qarjylyq buzýshylyq faktileri anyqtaldy

ASTANA. QazAqparat – Bıyl 4 aıda 46 mlrd teńgege qarjylyq buzýshylyqtar anyqtaldy. Bul týraly Úkimet otyrysynda Premer-Mınıstrdiń orynbasary – Qarjy mınıstri Erulan Jamaýbaev aıtty, dep habarlaıdy QazAqparat tilshisi.

«Osy jyldyń 4 aıynda kameraldyq baqylaýmen 5 trln teńge somaǵa jýyq 175 myń memlekettik satyp alý rásimi qamtyldy. Tekserý qorytyndysy boıynsha 26 836 rásim buzýshylyq anyqtaldy. Onyń ishinde olardy joıý týraly habarlamalardyń 90 paıyzyn memlekettik aýdıt obektileri oryndady», - dedi ol.

Qarjy mınıstriniń dereginshe, 684 aýdıtorlyq is-shara ótkizildi. Shamamen 303 mlrd teńge bıýdjet qarajatyna aýdıt jasaldy.

«Somasy 46 mlrd teńgege qarjylyq buzýshylyqtar anyqtaldy. Taýarlardy jetkizý, qyzmetterdi kórsetý men jumystardy oryndaý, bıýdjetke óteý jáne esepke alý jolymen 31 mlrd teńgege buzýshylyqtar joıyldy. Aýdıt obektileri qyzmetin jetildirý jáne tıimdiligin arttyrý úshin 692 usynym berildi», - dedi Erulan Jamaýbaev.