Jyl basynan beri 400-ge jýyq shalǵaı aýyl jyldamdyǵy joǵary ınternetke qosyldy
«2020 jyldyń basynan beri 393 aýylǵa talshyqty-optıkalyq baılanys jelisi salyndy. Bul aýyldyq eldi mekenderdi joǵary sapaly ınternetpen qamtamasyz etý jónindegi aýqymdy jobany iske asyrýdyń nátıjesinde múmkin boldy. Bul joba 2018 jyldan bastap memlekettik-jeke menshik áriptestik qaǵıdaty boıynsha iske asyrylýda. QR Tsıfrlyq damý, ınnovatsııalar jáne aeroǵarysh ónerkásibi mınıstrliginiń bul jobadaǵy seriktesteri, elimizdiń iri baılanys operatorlary: «Qazaqtelekom» AQ, sondaı-aq quramyna «Transtelekom» AQ men «SilkNetCom» JShS engen konsortsıým» dep atap ótedi mınıstrlikten.
Vedomstvo málimetinshe, 2020 jyldyń sońyna deıin baılanys operatorlary óz qarajaty esebinen 20 myń shaqyrymnan astam talshyqty-optıkalyq baılanys jelilerin salyp, 1250 shalǵaı aýyldaǵy mektep, aýrýhana men ákimdikke keń jolaqty Internet jelisine qosylý múmkindigin usynady. «Optıkalyq - talshyqty» joba iske asyrylǵaly beri 2065 aýrýhana, mektep, shuǵyl áreket etý qyzmeti, ákimdik jáne taǵy basqalary jumys isteıtin 706 aýylǵa jeli júrgizildi.
Sonymen qatar, aýyldarda talshyqty-optıkalyq jeliler bolǵan jaǵdaıda uıaly baılanys operatorlaryna ózderiniń bazalyq stansalaryn ornatýǵa jáne aýyl turǵyndaryn sapaly mobıldi ınternetpen qamtamasyz etý múmkin bolmaq.
Elimizde iske asyrylyp jatqan ekinshi joba aıasynda uıaly baılanys operatorlary 2020 jyldyń sońyna deıin 250-den astam adam turatyn barlyq aýylǵa mobıldi Internetti júrgizýge mindetteldi. Bul rette TOBJ jobasyn júzege asyrý nátıjesinde qurylǵan ınfraqurylymdy uıaly operatorlar 3G/4G tehnologııalaryn qoldaný úshin belsendi paıdalanbaq.
«Osylaısha 2020 jyldyń sońyna qaraı joǵary jyldamdyqty ınternetpen qamtamasyz etilgen eldi mekender sany 5 163 jetedi. Bul eldi mekenderde turyp jatqan halyq sany el halqynyń 99,3 paıyzyna teń» delingen mınıstrlik aqparatynda.