Jyl basynan beri 22 mln tonna munaı óndirildi – Energetıka mınıstri

NUR-SULTAN. QazAqparat – Qańtar-naýryz aılarynda munaı óndirý jáne eksporttaý kórsetkishterinde ósim baıqalady. Bul týraly QR Energetıka mınıstri Bolat Aqsholaqov aıtty, dep habarlaıdy QazAqparat tilshisi.

«Aldyn ala derekter boıynsha, bıylǵy qańtar-naýryzda munaı jáne kondensat óndirý kólemi 22,7 mln tonnany qurady. Onyń ishinde, Teńizde – 7,3 mln tonna, Qashaǵanda – 4,7 mln tonna jáne Qarashyǵanaqta 3,2 mln tonna munaı óndirildi», - dedi Energetıka mınıstri Úkimet otyrysynda.

Onyń aıtýynsha, esepti kezeńde 17,6 mln tonna munaı eksporttaldy, bul ótken jyldyń sáıkes kezeńimen salystyrǵanda 5,3%-ǵa artyq.

«Gaz salasy týraly aıtatyn bolsaq, jyl basynan beri 15 mlrd tekshe metr gaz óndirildi, bul ótken jyldyń osy kezeńine qaraǵanda 8,2%-ǵa óskenin kórsetedi. Taýarlyq gazdy ishki tutyný kólemi 6,7 mlrd tekshe metrdi qurady. Bul rette, ishki tutynýdyń ulǵaıýyna baılanysty gaz eksporty kólemi tómendedi», - dedi B. Aqsholaqov.

Buǵan deıin mınıstr Qazaqstannan benzın, dızel otynyn jáne munaı ónimderiniń basqa da jekelegen túrlerin áketý tyıymy taǵy 6 aıǵa uzaratynyn aıtqan edi.