Jyl basynan beri 1 mln qazaqstandyq jańa jumyspen qamtyldy

NUR-SULTAN. QazAqparat – Jyl basynan beri jumyspen qamtý sharalarymen 1 mıllıonnan astam qazaqstandyq qamtyldy. Bul týraly QR Eńbek jáne halyqty áleýmettik qorǵaý mınıstri Serik Shápkenov Úkimet otyrysynda aıtyp berdi, dep habarlaıdy QazAqparat tilshisi.

Mınıstrdiń aıtýynsha, 2020 jylmen salystyrǵanda eńbek naryǵy birtindep qalpyna kelip jatyr jáne onyń negizgi kórsetkishteri oń qarqyn kórsetýde.

«Ulttyq statıstıka bıýrosynyń málimetterine sáıkes, bıylǵy 2 toqsanda jumys kúshiniń sany 9,3 mln adamdy qurady. Onyń ishinde jumyspen qamtylǵandar sany 73 myń adamǵa artty. Salalar boıynsha jumyspen qamtylǵandardyń qatarynda qyzmet kórsetý salasynyń úlesi basym», - dedi Eńbek mınıstri.

Pandemııa bastalǵannan beri jumys berýshiniń bastamasymen ýaqytsha jumyspen qamtylmaǵandar sany 12,3 esege kemidi. Eń bastysy, jumyssyzdyq deńgeıi 4,9% kóleminde saqtaldy, al jastar arasyndaǵy jumyssyzdyq deńgeıi ótken jylmen salystyrǵanda tómendep, 3,7%-dy quraǵan.

«Jalpy, bıyl 1,2 mln adamdy jumyspen qamtý sharalary josparlanǵan. Onyń ishinde 700 myń adam «Eńbek» memlekettik baǵdarlamasy sheńberinde, 42 myń adam – Jumyspen qamtýdyń 2020-2021 jyldarǵa arnalǵan jol kartasy aıasynda jáne 440 myń jańa jumys oryndaryn qurý qarastyrylǵan. Qazirgi ýaqytta osy 3 baǵyt boıynsha 1 mıllıonǵa jýyq adam qoldaý sharalarymen qamtyldy», - dedi S. Shápkenov.