Jyl basynan 25 myń kópbalaly otbasy járdemaqynyń jańa túrin rásimdedi
«Azamattarǵa arnalǵan úkimet» memlekettik korporatsııasy taratqan aqparatqa sáıkes, onyń ishinde 11,8 myńnan astam otbasy járdemaqyny alǵash ret rásimdese, 13,7 myńy qaıta esepteýge qujat ótkizip otyr.
«Kópbalaly otbasylar halyqqa qyzmet kórsetý ortalyǵyna jeke tólqujattarymen kelip tıisti járdemaqyny rásimdeı alady. Osyǵan deıin járdemaqy alǵan otbasylar járdemaqynyń jańa túrin alýshylar tiziminde bar-joǵyn 1411 call-ortalyǵy men QR Eńbek jáne halyqty áleýmettik qorǵaý mınıstrliginiń www.enbek.gov.kz saıty arqyly da teksere alady», – deıdi «Azamattarǵa arnalǵan úkimet» memlekettik korporatsııasynyń basqarma tóraǵasy Ásemgúl Baltasheva.
Jalpy alǵanda 1 qańtardaǵy jaǵdaı boıynsha 368,9 myń otbasyǵa memlekettik járdemaqy taǵaıyndalǵan. Onyń 246 myńy buǵan deıin arnaýly memlekettik járdemaqy alǵan.
Aımaqtyq bóliniste jyl basynan beri járdemaqynyń rásimdelýine Túrkistan oblysynan kóp ótinish qabyldanǵan. Odan keıin Almaty oblysy men Shymkent qalasynyń turǵyndary kóp ótinish bergen.
Esterińizge sala ketsek, 2020 jyldan bastap otbasynda birge turatyn kámeletke tolmaǵan tórt jáne odan da kóp balalary, onyń ishinde 23 jasqa deıin stýdent balalary bar otbasylarǵa tólenetin memlekettik járdemaqy kólemi mynadaı: 4 balaǵa – 42 496 teńge, 5 balaǵa – 53 127 teńge, 6 balaǵa – 63 757 teńge, 7 jáne odan kóp balaǵa – 74 388 teńge.