Jyl basynan 15 myń tonnadan astam benzın eksporttaldy – Bozymbaev

ATYRAÝ. QazAqparat – Qazaqstan avtobenzın boıynsha netto-eksporttaýshyǵa aınaldy. Bul týraly Atyraý oblysynda jumys saparymen kelgen Qanat Bozymbaev aıtty, dep habarlaıdy QazAqparat tilshisi.

«Munaı ónimderin óndirý sektorynda jańǵyrtý jumystarynyń arqasynda munaı óńdeý zaýyttary qýattylyq pen qaıta óńdeý tereńdigin ulǵaıtty. Segiz aıdyń ishinde munaıdy qaıta óńdeý 11,2 mln tonnany qurady. Ótken jyldyń sáıkes kezeńimen salystyrǵanda ósim 6 paıyzdy qurady. Munaı ónimderiniń óndirisi benzın boıynsha – 14,3 paıyzǵa, dızeldi otyn boıynsha – 9,6 paıyzǵa, avıaotyn boıynsha 212 paıyzǵa artty. Munaı ónimderi kóleminiń artýy bólshek naryqqa da yqpalyn tıgizdi. Onda jyl basynan beri benzın baǵasynyń tómendeýi baıqaldy», - dedi mınıstr.

Atap ótilgendeı, óndiristi qoldaý maqsatynda benzın eksportyn ashý boıynsha másele pysyqtalǵan. Osylaısha, bıylǵy shilde aıynan bastap Qazaqstan avtobenzındi EAEO aýmaǵynan tys naryqtarǵa shyǵarý múmkindigimen netto-eksporttaýshy boldy. Eksporttyq jetkizilimder bastalyp ketken. Búginge deıin 15 myń tonnadan astam avtobenzın shetelge satyldy.

Eske salaıyq, Atyraýda Prezıdent Qasym-Jomart Toqaevtyń tóraǵalyǵymen munaı-gaz salasyn damytý máselelerine arnalǵan keńeıtilgen keńes ótti.