Júzshaqty áskerı qyzmetshi Tekelidegi laı kóshkini saldaryn joıýǵa jumyldy

TALDYQORǴAN. QazAqparat - Almaty oblysynyń Tekeli qalasyndaǵy tótenshe jaǵdaı saldaryn joıýǵa 28237 áskerı bóliminiń 100 qyzmetkeri men 7 tehnıkasy tartyldy, dep habarlaıdy QazAqparat.

Áskerı qyzmetshiler men jergilikti atqarýshy organdardyń arnaıy tehnıkasy jeke úıler men kósheler aýmaǵynda qalǵan balshyq massasyn tazartýda.

«16 mamyr kúngi laı kóshkininen keıin jalpy 890 tekshe metr balshyq shyǵaryldy, 81 reıs jasaldy. Qazirgi ýaqytta Qonaev kóshesi balshyq massasynan tazartyldy. Avarııalyq-qutqarý jáne kezek kúttirmeıtin jumystardy júrgizýge Almaty oblysy TJD-niń 8 qyzmetkeri men 3 tehnıkasy, polıtsııa bóliminiń 6 qyzmetkeri men 2 tehnıkasy, jergilikti atqarýshy organdardyń 20 qyzmetkeri men 10 tehnıkasy, 16 qyzmetkeri men 8 tehnıkasy, onyń ishinde «Qazseldenqorǵaý» MM-niń 3 tehnıkasy jumyldyryldy», - dep jazdy jergilikti TJD baspasóz qyzmeti.

Esterińizge sala keteıik, keshe 15 mamyr kúni saǵat 12.10-da Almaty oblysynyń Tekeli qalasynda (balshyq massasy, aldyn ala eseptelgen uzyndyǵy - 50 metr, eni - 25 metr, bıiktigi - 3,5 metr, kólemi - 4375 tekshe metr) sý tasqyny boldy. Saldarynan 5 jasar qyz qaıtys bolyp, turǵyn úıler zardap shekti.