Júzden astam órt sóndirýshi Kókshetaý mańyndaǵy dala órtimen arpalysyp jatyr

KÓKShETAÝ. QazAqparat - Kókshetaý qalasy mańyndaǵy dalada qurǵaq shóp órtendi, dep habarlaıdy QazAqparat tilshisi Aqmola oblystyq TJD baspasóz qyzmetine silteme jasap.

Vedomstvonyń málimetinshe, búgin Podhoz kenti aýmaǵynda «Kókshetaý – Şýche» tas jolynyń 7 shaqyrymy tusynda dala órtendi.

«Qyzyl jalyn 20 gektar aýmaqty sharpydy. Órtti sóndirýge TJD jeke quramynan 96 adam jáne 10 órt sóndirý tehnıkasy, M.Ǵabdýllın Azamatyq qorǵaý akademııasynyń 28 qyzmetkeri jáne 1 tehnıkasy, «Buqpa» orman sharýshylyǵy mekemesiniń 25 qyzmetkeri jáne 5 tehnıkasy jumyldyrylýda. Órtten zardap shekkender joq, sondaı-aq, eldi-mekenderge de qaýp tónip turǵan joq. Qazirgi kezde órtti sóndirý jumystary odan ári jalǵasýda», - deıdi vedomstovodan.

Aıta ketsek, Aqmola oblysynyń Birjan sal aýdanynda naızaǵaı túsip, dala órti órshidi, ony sóndirmekshi bolǵan er adamnyń denesin kúıik shalyp kóz jumǵan edi.

Osy rette, Aqmola oblystyq TJD mamandary óńirde kúnniń aptap ystyq bolýyna baılanysty turǵyndaryn órt qaýipsizdigi erejelerin saqtaýǵa shaqyrady.