Júz jasaǵan qyzylordalyq maıdanger ótken kúnderden estelik jazýda

QYZYLORDA. QazAqparat - Qyzylorda oblysynda turatyn 99 jastaǵy qart maıdanger Sársenbek Baıjanov búginde general-feldmarshal Paýlıýsti tutqyndaýǵa arnalǵan «Sheńber» operatsııasyna qatysqan kózi tiri sanaýly jaýyngerdiń biri, dep habarlaıdy QazAqparat tilshisi.

1923 jyldyń 1 mamyrynda Shıeli aýdany, Úlgili eldi mekeninde dúnıege kelgen ol soǵysqa attanǵan. Aldymen 3 aı boıy Almaty qalasynda urys taktıkasyna mashyqtanǵan-dy. Odan keıin Stalıngrad shaıqasyna jiberilgen.

Jaýynger Stalıngrad shaıqasynda «Sheńber» operatsııasyna qatysty. Atalǵan operatsııa negizinen general-feldmarshal Paýlıýsti tutqyndaýǵa arnalǵan. Kózi men aıaǵynan jaraqat alǵan maıdanger sodan keıin maıdannan elge oraldy.

Maıdan dalasynda kórsetken erligi úshin «Qyzyl juldyz», «Birinshi dárejeli Otan soǵysy» ordenderi men áskerı medaldar aldy.

Qazynaly qarııanyń jas urpaqqa sherter áńgimesi, aıtar ósıeti kóp. Keıde dombyramen án salyp, ózi oıynan shyǵarǵan termelerdi tolǵap qoıady. Maıdanger qarııanyń mamandyǵy – pedagog.

Soǵystan keıingi jyldarda Sársenbek Baıjanov aldymen kolhozda jumysshy bolyp eńbek etti. Bilimge qushtar Baıjanov 1950-1953 jyldar aralyǵynda Túrkistan pedogogıkalyq ýchılışesinde oqyp, muǵalim mamandyǵyn alyp shyǵady. Qurmetti zeınetkerlikke shyqqanǵa deıin ol Shıeli aýdanynda № 156 qazaq orta mektebinde jarty ǵasyr ǵumyryn jas urpaqtyń bilimi men tárbıesine arnady.

Soǵys ardageri qazirde ótken ómirinen estelik jazady. Elge maıdannan óleńmen jazǵan hattary da saqtaýly. Qart ustazdyń jady áli de myqty, soǵys derekterin jatqa biledi. Onyń estelik áńgimelerinde adamgershilik pen eńbekqorlyq, adaldyq pen rýhanılyq dáripteledi.

Qart ustaz, maıdanger Sársenbek Baıjanov bıyl Uly Otan Soǵysynyń 77 jyldyǵyn atap ótti.

Eske salsaq, budan buryn júz jastaǵy qyzylordalyq maıdanger «Beıbit zamanda baqytty balalardyń kúlkisin kórdim - júz jastaǵy qyzylordalyq maıdanger» degen oıymen bólisti.