Júıeli jemqorlyq kórsetkishi eń joǵary 4 óńir ataldy

NUR-SULTAN. QazAqparat – Júıeli sybaılas jemqorlyqtyń basym bóligi Almaty oblysynda, Almaty qalasynda, Shyǵys Qazaqstan jáne Qostanaı oblysynda anyqtalǵan. Bul týraly Antikor News jobasynyń tikeleı efırinde aıtyldy, dep habarlaıdy QazAqparat tilshisi.

«Statıstıka kórsetkendeı, júıeli sybaılas jemqorlyqtyń basym bóligi: Almaty oblysynda – 12 fakti (66 qylmys), Almaty qalasynda – 9 (36 qylmys), Shyǵys qazaqstan (51 qylmys) jáne Qostanaı (37 qylmys) oblystarynda 7 fakti boıynsha anyqtaldy», - deıdi Agenttiktiń asa mańyzdy ister jónindegi tergeýshisi Danııar Bıǵaıdarov.

Ol ótken aptada túrli salalarda anyqtalǵan sybaılas jemqorlyqtyń júıeli faktilerine toqtalyp ótti.

«Shymkent qalasy boıynsha Sybaılas jemqorlyqqa qarsy qyzmet Esirtki bıznesine qarsy kúres bólimshesiniń, Túrkistan oblysy boıynsha Polıtsııa departamentiniń Arys aýdandyq polıtsııa bóliminiń bastyǵyna qatysty birneshe ret alaıaqtyq jasady degen kúdikpen sotqa deıingi tergeýdi bastady. Polıtsııa maıory 2019 jyldyń tamyz aıynda polıtsııa qyzmetkeri bola tura, Shymkent qalasynyń azamattaryn aldaý jáne senimine qııanat jasaý arqyly jalpy somasy 94 mln teńge turatyn qymbat «Lexus LX 570» jáne «Toyota Camry» markaly 4 avtokóligin ıemdenip jáne osyǵan uqsas jolmen shartty túrde merziminen buryn bosatýǵa yqpal etý syltaýymen sottalǵannyń 33 myń AQSh dollaryn quraıtyn aqshalaı qarajatyn ıemdenip alǵan degen kúdikke ilindi. Bıyl 29 tamyzda kúdiktige qatysty «kúzetpen ustaý» túrindegi bultartpaý sharasy sanktsııalandy», - deıdi ol.