Júsipbek Aımaýytovtyń 20-dan astam dramatýrgııalyq shyǵarmasy tabyldy
Bıyl kórnekti jazýshy, dramatýrg, pýblıtsıst, qazaq ádebıetiniń negizin qalyptastyrýshylardyń biri, Ertis-Baıan óńiriniń týmasy Júsipbek Aımaýytovtyń týǵanyna 135 jyl toldy.
Tulǵanyń mereıtoıyna oraı J.Aımaýytov atyndaǵy Pavlodar oblystyq qazaq mýzyka-drama teatrynyń uıymdastyrýymen «Ar aldaspany Aımaýytov» atty respýblıkalyq ǵylymı konferentsııa ótkizildi.
Konferentsııa jumysyna KSRO Halyq artısi, Qazaqstannyń Eńbek Eri, M.Áýezov atyndaǵy Qazaq ulttyq drama teatrynyń kórkemdik jetekshisi Asanáli Áshimov, ónertaný doktory Baqyt Nurpeıis, Júsipbek Aımaýytovtyń shóberesi (jıenshary) Pavel Aımaýytov jáne júsipbektanýshy ǵalymdar men qalamgerler, teatr salasynyń maıtalmandary qatysty.
— Tulǵanyń Baıanaýyl jerinen túlep ushyp, qazaq rýhanııaty men mádenıeti úshin jasap ketken jaqsylyǵyn áldebir dúnıemen ólsheý múmkin emes. Ǵalym retinde ómirinde atqarǵan isteri bir tóbe. Al ult joqshysy, halyq pedagogıkasynyń sheberi, pýblıtsıst, dramatýrg retinde atqarǵan eńbekteriniń jemisin búgingi urpaq áli de kórip, sezinip otyr, -dep atap ótti Pavlodar oblysy ákiminiń orynbasary Aıgúl Malıkova quttyqtaý sózinde.
Іs-sharada Alash qaıratkeriniń Qazaq teatr ónerine engizgen jańashyldyǵy, dramatýrgııadaǵy shyǵarmashylyq qyry, tulǵanyń ómirine qatysty tyń málimetter baıandalyp, júsipbektaný máseleleri talqylandy.
— Búgingi qoǵam — kitap oqymaıtyn qoǵam. Demek, osy oraıda teatrdyń eńbegi — erekshe. Al kitap oqymaıtyn, keıipkerdi tanymaıtyn adamǵa sol shyǵarmany sahnalaý ońaı emes. Teatrda prozalyq shyǵarmalardy somdaý — óte mańyzdy. Bul baǵytta úlken jumystar atqarylýy kerek. Júsipbek Aımaýytovtyń «Aqbilek» shyǵarmasy — búgingi kúnniń ózekti máselesin kórsetetin, oı týdyratyn shyǵarma, — dep oı bólisti M.Áýezov atyndaǵy Qazaq ulttyq drama teatrynyń dırektory Erkin Jýasbek.
Al fılologııa ǵylymdarynyń kandıdaty, Toraıǵyrov ýnıversıteti úshtuǵyrly til kafedrasynyń meńgerýshisi, júsipbektanýshy ǵalym Aıman Zeınýlına Alash arysynyń dramatýrgııadaǵy qyry jaıynda baıandady.
Aıtýynsha, ǵalymdar osy ýaqytqa deıin tulǵanyń 10-ǵa jýyq dramatýrgııalyq shyǵarmasy bar dep eseptep kelgen. Jýyqta tabylǵan arhıvtik qujattardan Júsekeńniń teatrǵa arnap 25-ten astam shyǵarma jazǵany anyqtalǵan.
Sondyqtan dramatýrgtiń bul turǵydaǵy eńbekteri áli de zerdeleı túsýdi qajet etedi.
Konferentsııada sondaı-aq, Eýrazııa ulttyq ýnıversıtetiniń oqytýshysy Muhıt Omarov, qalamger Serik Elikbaı, aqyn, jazýshy, «Aqbettaý» jýrnalynyń redaktory Saılaý Baıbosyn, baıanaýyldyq ólketanýshy Ramazan Nurǵalıev, QR eńbek sińirgen artısi Muhtarhan Manap J.Aımaýytovtyń qazaq teatr ónerin damytýǵa sińirgen eńbegi jaıynda óz bilgenderimen bólisti.
Eske sala keteıik, Baıanaýylda Aımaýytov qurǵan «Mádenı kindik» mekenine belgitas qoıyldy.