«Jýsan» operatsııasynyń arqasynda elge oralǵan áıelderdi 100 paıyz ońaltý kerek - Abaev

NUR-SULTAN. QazAqparat - «Jýsan» operatsııasynyń arqasynda elge oralǵan áıelderdi 100 paıyz ońaltý kerek. Bul týraly búgin QR Aqparat jáne qoǵamdyq damý mınıstrliginiń keńeıtilgen alqa otyrysynda vedomstvo basshysy Dáýren Abaev aıtty, dep habarlaıdy QazAqparat tilshisi.

«Din salasynda bizdiń aldymyzda kelesideı mindetter tur. Birinshiden, orta merzimdi keleshekte din salasyn damytý boıynsha strategııalyq qujat ázirlep, qabyldaý qajet. Bıyl 2017-2020 jyldarǵa arnalǵan Din salasyndaǵy memlekettik saıasat tujyrymdasyn júzege asyrý merziminiń aıaqtalatyndyǵy belgili», - dedi Dáýren Abaev.

Sonymen qatar, mınıstr ekinshiden, osy salaǵa basshylyq jasaıtyn orynbasaryna «Jýsan» operatsııasynyń arqasynda lańkestik belsendilik ýshyǵyp turǵan aımaqtardan elimizge oralǵan áıelderdi 100 paıyz ońaltý mindetin júktedi.

«Úshinshiden, bıyl Dintanýshylardyń forýmy men Álemdik jáne dástúrli dinder kóshbasshylary seziniń XIX hatshylyǵyn ótkizý qajet. Tórtinshiden, Almaty qalasynda «Nur-Múbárak« ýnıversıtetiniń jańa korpýsynyń qurylysyn bastaý kerek», - dedi ol.