«Jýsan» operatsııasy: Taǵy bir otandasymyz Sırııadan 4 balasymen elge jetkizildi

ASTANA. QazAqparat – Syrtqy ister mınıstrliginiń resmı ókili Aıbek Smadııarov Sırııadan 4 balasy bar taǵy bir otandasymyzdyń elge jetkizilgeni týraly aqparatty rastady, dep habarlaıdy QazAqparat tilshisi.

Buǵan deıin Tájikstannyń Syrtqy ister mınıstrligi Sırııadan 104 adamnyń otanyna oralǵany týraly málimet taratqan bolatyn.

«Sonymen qatar Qazaqstan tarapynyń ótinishi boıynsha osy reıspen Sırııadan Tájikstanǵa Qazaqstan Respýblıkasynyń 5 azamaty (anasy jáne 4 balasy) jetkizildi», - delingen edi Tájikstan SІM málimetinde.

Osyǵan oraı búgin elimizdiń Syrtqy ister mınıstrliginde ótken brıfıng barysynda BAQ ókilderi vedomstvonyń resmı ókilinen atalǵan aqparatty naqtylaýdy ótingen edi.

«Iá, rastaımyz. Bul birneshe kún buryn boldy jáne olar qazir Qazaqstanǵa jetkizildi. Qazirgi ýaqytta olarmen psıhologtar jumys istep jatyr. Munyń bári «Jýsan» operatsııasynyń aıasynda. Qazaqstan Sırııa aýmaǵynan azamattaryn evakýatsııalaýdy jalǵastyrýda», - dep jaýap berdi Aıbek Smadııarov.