«Jýsan» operatsııasy: Elge qaıtarylǵan otandastarymyzdy ońaltý jumysy jalǵasady

NUR-SULTAN. QazAqparat – Dinı radıkalızmmen kúresti kúsheıtý úshin elde taraıtyn dinı kontentti muqııat baqylap, sondaı kontent taratý kózederine jazylǵan qazaqstandyq ınternet paıdalanýshylarmen jiti jumys júrgizilmek, dep habarlaıdy QazAqparat tilshisi.

Internet arqyly halyqtyń radıkaldanýyna jol bermeý úshin elimizde radıkaldy dinı kontentti anyqtap, ınternet keńistiktiń monıtorıngin kúsheıtý jáne áleýmettik jelilerdegi radıkaldy toptar men qoǵamdastyqtarǵa jazylǵan qazaqstandyqtarmen jeke-jeke jumys júrgizilmek.

Bul týraly Aqparat jáne qoǵamdyq damý mınıstri Asqar Ýmarov búgingi Úkimet otrysynda aıtty.

«Mınıstrlik jergilikti atqarýshy organdarmen birlesip jalpy profılaktıkalyq sıpattaǵy, sondaı-aq, radıkaldy ıdeologııaǵa tartylý táýekeli bar halyqtyń nysanaly toptary arasynda aqparattyq túsindirý jumystasryn uıymdastyrady.Áleýmettik jelilerge nazar aýdara otyryp, radıkaldy dinı ıdeologııanyń aldyn alý jáne qarsy nasıhattaý boıynsha aqparat alańynda belsendi jumys júrgizip otyr.Destrýktıvti jáne radıkaldy dinı kózqarasty ustanýshylardy dástúrli ıslam arnasyna qaıtarý maqsatymen mınıstrlik arnaıy quqyq qorǵaý jáne jergilikti atqarýshy organdarmen birlesip ońaltý jumystaryn júrgizýde. Ásirese jastar, jumyssyzdar jáne óz-ózin jumyspen qamtyǵan azamattar, dindarlar destrýktıvti dinı aǵymdardyń jaqtaýshylary sııaqty azamattardyń neǵurlym osal toptarymen dittegen aqparattyq túsindirý jumystaryn kúsheıtý kózdelip otyr», - dedi mınıstr.

Sondaı-aq, mınıstrlik «Jýsan» operatsııasynyń aıasynda terrorızm oshaqtarynan elge qaıtarylǵan otandastarymyzdy ońaltý jumysyn odan ári jalǵastyrýǵa nıetti.