«Jýsan» operatsııasy: AQSh Kongresiniń múshelerine arnalǵan vebınar ótti
Qazaqstan Elshiligi AQSh-tyń Kongress ókilderi palatasyndaǵy Qazaqstan-AQSh Kokýsymen (dostar tobymen) birlesip, qazaqstandyqtardy soǵys aımaqtarynan qaıtarý jáne olardy qoǵamǵa qaıta beıimdeý tájirıbesin talqylaý maqsatynda is-sharany uıymdastyrdy.
Vebınardyń negizgi spıkerleri retinde Qazaqstan Syrtqy ister mınıstriniń orynbasary Erjan Ashyqbaev jáne Terrorızmge qarsy is-qımyl barysynda adam quqyqtaryn ilgeriletý jáne qorǵaý boıynsha BUU-nyń Arnaıy baıandamashysy Fıonýalla Nı Aolaın qatysty.
Elshi Erjan Qazyhanov «Jýsan» operatsııasy Qazaqstan úshin mańyzdy tájirıbe bola turyp, basqa elderge jarqyn úlgi ekenin atap ótti. Sonymen qatar, bul joba jınalǵan tájirıbe men daǵdylardy damytýǵa jáne taratýǵa baǵyttalǵan Qazaqstandaǵy Úzdik tájirıbeler ortalyǵy túrinde óz jalǵasyn tabatynyna senim bildirdi.
E. Ashyqbaev operatsııanyń barlyq kezeńderin egjeı-tegjeıli baıandap, álemniń 80-nen astam elindegi azamattardyń terrorıstik uıymdarǵa qatysýlary máselesine tap bolǵanyn ókinishpen atap ótti. Sondaı-aq, AQSh seriktesterine operatsııany ótkizýge qoldaý kórsetkeni úshin rızashylyǵyn bildirip, Qazaqstan óz tájirıbesimen basqa eldermen bólisýge daıyn ekendigin aıtty.
Sonymen qatar, E. Ashyqbaev «Jýsan» operatsııasy eń aldymen, radıkaldy ıdeologııanyń qurbany bolǵan áıelder men balalardy qorǵaýǵa baǵyttalǵan gýmanıtarlyq mıssııa ekendigine nazar aýdardy.
BUU-nyń arnaıy baıandamashysy óz sózinde soǵys júrip jatqan aımaqtan azamattardy elge qaıtarý jáne qoǵamdyq qaıta beıimdeý máselesinde Qazaqstannyń álemdik kóshbasshylyǵyna erekshe mán berip, basqa elderdi memleketimizdiń tájirıbesin úlgi retinde qabyldaýǵa shaqyrdy. Osyǵan qosa, Qazaqstan Úkimetiniń yntymaqtastyqqa ashyq jáne dıalog ornatýǵa daıyn ekendigin erekshe atap ótti.