Júrýge jaramsyz kólikke de salyq salynady

NUR-SULTAN. QazAqparat – Júrýge jaramsyz bolyp qalǵan kólikke salyq tólemeý úshin ýákiletti organdardyń memlekettik tirkeýinen shyǵarý qajet, dep habarlaıdy QazAqparat tilshisi.

Bul týraly Memmlekettik kirister komıtetiniń Óndiristik emes tólemderdi ákimshilendirý basqarmasy basshysynyń orynbasary Oljas Otar Ortalyq kommýnıkatsııalar ortalyǵynda ótken brıfıngide aıtty.

«Biz bir jaǵdaıdy túsinip alýymyz kerek. Kóptegen qazaqstandyqtardy mazalap júrgen máseleniń biri osy. Kólik jaramsyz bolyp qalǵan jaǵdaıda da ol ishki ister organdarynyń memlekettik tirkeýinen shyǵarylmasa, salyq esepteledi. Tirkeýden shyǵarylǵanǵa deıin júrse de, júrmese de salyq esepteledi», - dedi komıtet ókili.

Mamannyń aıtýynsha, isten shyqqanymen tirkeýden shyǵarylmaǵan kóliktiń salyǵyna qatysty shaǵymdar vedomstvoǵa jıi túsedi eken.

«Kóptegen azamattardan aryz, shaǵymdar túsip jatady. «Bálen jyl buryn jaramsyz bolyp qalǵan, úıdiń aýlasynda qańyrap bos turǵan kólik úshin nege salyq tóleýim kerek» dep jatady. Salyq zańnamasynda bul másele anyq jazylǵan. Memlekettik tirkeýden shyǵarylǵanǵa deıin siz salyq tóleýge mindettisiz. Osy efırdi paıdalanyp salyq tóleýshilerge aıtqym keledi. Eger attaryńyzda jaramsyz bolyp qalǵan kólikter bolsa, erterek ýákiletti organdardyń esebinen shyǵartyp tastaýlaryńyz qajet», - dedi Oljas Otar.

Ol, sondaı-aq, senim hat arqyly satylǵan kólik Іshki ister organdarynyń memlekettik tirkeýi boıynsha kimniń atynda tursa, salyqty sol adam tóleıtinin eskertti.