Jurttyń bárine jaǵa bermeıtin, biraq tıimdi sheshimder qabyldaý kerek bolady - Prezıdent

ASTANA. QazAqparat – Ekonomıkada jáne áleýmettik salada jyldar boıy jınalyp qalǵan túıtkilder bar. Bul týraly VIII saılanǵan QR Parlamentiniń birinshi sessııasy otyrysynda Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Aldymyzda aıryqsha mańyzdy mindetter tur. Biz jan-jaqty jańǵyrtý jumysyn kúsheıtýimiz qajet. Sondaı-aq, áleýmettik-ekonomıkalyq damý barysyna tyń serpin berýimiz kerek. Elimiz uzaq ýaqyt boıy qolaıly syrtqy ahýalǵa arqa súıep keldi. Neshe túrli tujyrymdamalarǵa, baǵdarlamalarǵa sendi. Atqarylǵan jumys týraly jalǵan esepke senýge májbúr boldy. Alaıda, asa mańyzdy, ózekti máseleler nazardan tys qaldy. Halyqtyń turmys sapasy áli kúnge deıin jaqsy emes. Quqyqtyq ádiletsizdik beleń aldy. Baı men kedeıdiń arasy alshaqtaı tústi. Aldaǵy bes jylda Úkimet jáne Parlament osy negizgi máselelerdiń sheshimin tabýy qajet», - dedi Qasym-Jomart Toqaev.

Osy oraıda Prezıdent ekonomıkada jáne áleýmettik salada jyldar boıy jınalyp qalǵan túıtkilder bar ekenin aıtty.

«Onyń barlyǵyn retke keltirýimiz qajet. Sol úshin jurttyń bárine birdeı jaǵa bermeıtin, biraq tıimdi ári qajetti sheshimder qabyldaý kerek bolady», - dedi Memleket basshysy.