Júrsin Erman: Kún jamany keter – bul náýbetten de shyǵarmyz

NUR-SULTAN. QazAqparat – Qazaqstannyń Eńbek sińirgen qaıratkeri Júrsin Erman qazir halyqty bir-birine sep bolýǵa, qamqorlyq jasap, tártip saqtaýǵa shaqyrdy, dep habarlaıdy QazAqparat tilshisi.

«Almatynyń irgesinde Jańalyq deıtin aýyl bar. 1937-1938 jyldardaǵy saıası qýǵyn-súrgin qurbandarynyń talaıy sol jerde jerlengen. Sáken Seıfýllın, Іlııas Jansúgirov, Beıimbet Maılınder... Kóp qoı qurban bolǵandar. Ár jyldyń mamyr aıynyń sońǵy kúni sol jerge baryp, quran oqyp, ardaqty Alashtyń arystaryn eske alyp, aza tutýshy edik. Endi qazir el bolyp, memleket, halyq bolyp Aza tutý kúniniń ústinde otyrmyz. Bir adamǵa kóńil aıtýǵa boı úırengen ǵoı. Búkil halyqqa kóńil aıtý asa qorqynyshty eken», - deıdi Júrsin Erman.

Qazaqstannyń Eńbek sińirgen qaıratkeri qazaqtyń nebir aıaýly da asyl azamattary ketip jatqanyn ókinishke eske aldy.

«Ár adamnyń, ár qazaqtyń ómiri qymbat. Memleketimiz bar dep kóńildi keńge salýshy edik. Alaıda keı qıyndyqqa daıyn emes eken. Ásirese medıtsına salasynan muny kórip otyrmyz. Biraq tilekti jaqsylyqqa tileý kerek. Búgin barlyq jerde Tý túsirilip, Quran qatym oqylyp, qurbandyq shalynyp, aza tutyp, bir-birimizge kóńil aıtyp jatyrmyz. Kún jamany keter deýshi edi ǵoı qazaq. Bul indettiń qashan ketetinin qaıdan bileıik. Maýsymda jaǵdaı turaqtalǵandaı bolyp edi – qazir múlde órship ketti. Áleýmettik jelini ashýǵa, telefon shyryldasa da qandaı habar kelip tur eken dep qorqyp otyratyn boldyq. Dese de úreıge boı aldyrmaý kerek», - deıdi ol.

Júrsin Erman bir-birimizge sep bolyp, qamqorlyq jasap, qatań sharalardyń bárine moıynsynyp, tártip saqtaýymyz kerektigin jetkizdi.

«Qaıtys bolǵan azamattardyń týǵan-týystaryna, jaqyndaryna qaıǵyryp kóńil aıtamyz. Sabyr bersin. Bul náýbetten de Alla jar bolsa shyǵatyn shyǵarmyz. Soǵan úmitteneıik, soǵan duǵa jasaıyq. Barshamyzdy jaqsy kúnderde kórisýge jazsyn, Alla Taǵala», - dedi Júrsin Erman.

Aıta ketsek, elimizde qalyptasqan ahýalǵa baılanysty halyqqa úndeý jasaǵan QR Prezıdenti Qasym-Jomart Toqaev 13 shildeni – Ulttyq aza tutý kúni dep jarııalaıtyny týraly málim etken bolatyn. Tıisti ókimge Memleket basshysy kelesi kúni qol qoıdy.

Qazaqstanda koronavırýs pandemııasynyń qurbany bolǵan azamattardy eske alýǵa baılanysty búgin - Jalpyulttyq aza tutý kúni.