Júrsin Erman: Elbasymyz ult bolyp uıysýdyń sara jolyn siltedi
Asa mártebeli Elbasy Nursultan Ábishuly!
Jıynǵa qatysýshy el azamattary!
«Rýhanı jańǵyrý: bolashaqqa baǵdar» atty maqala jaryqqa shyqqanǵa deıingi qazaq ultynyń kóńil aýany bir bólek, jaryqqa shyqqannan keıingi kóńil-kúıi bir bólek der edim. Qazaq qoǵamynyń osyndaı bir túbegeıli ózgeriske zárý ekenin árqaısymyzdyń ishimiz sezýshi edi. Osyndaı bir silkinisti, serpilisti kútetin sııaqty edik. Bul asa kúrdeli de kóregen baǵdarlama kútkenimizden de asyp tústi.
Qurmetti Elbasy!
Rýhanı jańǵyrýdyń qazaq qaýymyn túletýdiń barlyq keshendi sharalaryn Siz soqyrǵa taıaq ustatqandaı anyqtap, qolymyzǵa shyraǵdan jaǵyp berdińiz. Búkil zııaly qaýym osy maqaladaǵy ozyq ıdeıalardy qoldap, qoshtap otyr dep nyq senimmen aıta alamyn.
Táýelsizdik alǵannan bergi jyldardaǵy sheshimin tappaı kele jatqan eń kúrdeli másele osy rýhanı jańǵyrý bolsa, elińizdi, halqyńyzdy, ultyńyzdy rýhanı azattyqqa bastaýdyń jolyn kórsetip berip otyrsyz.
Endi, osy syndarly shaqta tóńiregińizden tabylyp, Sizge qoldaý kórsetý - ulttyń zııaly qaýymyna da syn.
Sizdiń maqalańyzda «Ómir súrý úshin ózgere bilý kerek. Oǵan kónbegender tarıhtyń shańyna kómilip qala beredi»,- degen qatal da ádil qaǵıda bar.
Uly hakim Abaı: «Men eger zakon qýaty qolymda bar kisi bolsam, adam minezin túzep bolmaıdy degen kisiniń tilin keser edim» degen joq pa? Dál qazir ár qazaqtyń túbegeıli ózgeretin, oıyn, jan saraıyn jańǵyrtatyn shaǵy. Ýaqyttyń utymdy shaǵynda ýysymyzǵa túsip turǵan tarıhı múmkindikti qos qolymyzben qoldap, zaman kóshine ilesýdiń barlyq sharalaryn qamtyp qalý kerek ekenin bizder, shyǵarmashylyq adamdary, ábden jaqsy túsinemiz.
Onyń ústine, rýhanı jańǵyrý úshin ulttyq kodyńdy saqtaı bil depsiz. Bul - ult janashyrlarynyń júregine jetetin sóz. Urpaqtan urpaqqa úzilmeı kele jatqan tektiligimizge tabyný, namysymyzdy oıatý, ulttyq qadir-qasıetimizge júginý degen sóz. Kók túrikterdiń qara shańyraǵynda otyrǵan tekti halyq óziniń «tamyrynda búlkildep jatqan izgi qasıetterin qaıta túletýge» qulshynatyn shaq - osy! Osy tusta bir silkinbesek, bir serpilmesek, halyqtyǵymyzǵa da, eldigimizge de syn.
Qurmetti Elbasy!
Tarıhı maqalada belgilengen barlyq jańǵyrý sharalary ultym dep emirenetin árbir zııaly azamattyń ishin jylytyp otyrǵany sondyqtan. Jazýshy bolsyn, aqyn men ártis, sazger bolsyn, búgin úmittiń otyn úrlep, senimniń atyna minip otyr.
Ásirese, latyn álipbıine kóshý týraly sheshimdi biz tolyq qoldaımyz. Memleketimizdiń tájirıbesinde buryn da bolǵan latyn álipbıi órkenıet álemindegi baǵdarymyzdy túbegeıli ózgertetinin kórip-bilip otyrmyz.
Seksen jyl serigimiz bolǵan kırıllıtsada qaǵazǵa túsken myńdaǵan ádebı shyǵarmanyń eń halyqqa qajettisi ǵana kádege jaraıdy. Ult múddesine jaraıtyndary ǵana kóshke ilesedi. Bul tabıǵı suryptaý emes pe? Kırıllıtsaǵa baýyr basyp qalǵan kertartpalar orys mádenıetinen kóz jazyp qalamyz dep ýaıymdamaı-aq qoısyn. Tarıhı taǵdyrlas kórshimizdiń, orys eliniń Pýshkın, Tolstoı men Týrgenev, Esenın men Evtýshenko sekildi alyptary jasaǵan máńgilik mádenıet bizdiń rýhanııatymyz úshin eshqashan bóten bolmaıdy. Eń bastysy - álemge ortaq rýhanı ıgilikke júregimiz ashyq.
Siz usynǵan «Týǵan jer» baǵdarlamasy da bizdi enjar qaldyra almaıdy. Kindik qanymyz tamǵan jerdiń kóne tarıhyn tereńdete jańasha zerdeleý, onyń búgingi mádenıeti men salt-dástúrine atsalysý arqyly bizdiń árqaısymyz babalar aldyndaǵy perzenttik paryzymyzdy óteýge úles qosýymyz kerek. Aýylǵa - alamyn dep, at minip, shapan kıemiz dep barýdy doǵaratyn kez jetti. At jalyn tartyp mingen shaqta aýylyma ne septigim tıedi dep oılanbasaq qur sanatta bolyp, sannan tabylǵannyń nesi sán?
«Qazaqstannyń 100 jańa esimi» degende, búgingi zamannyń jas urpaǵyna úlgi etip usynar eldiń erleri, ulttyń ustyndary anyqtalar qundylyqtardyń orny belgilener dep otyrmyz.
Úlkenin syılaý, qarııasyn qurmetteý - bizdiń ulttyq dástúrimiz. Syndarly sátterde elge toqtaý aıtar, basý aıtar, óskeleń urpaqqa ónege bolar azamattarǵa zárýmiz. «Áı» deıtin ájesi, «qoı» deıtin qojasy» bar el - azbaıdy. Soǵan oraı, eldiń táýelsizdigi jolynda mańdaı terin tókken qaıratkerlermen qatar laıyqty jastar da qoǵamnan der kezinde óz baǵasyn alsa, bul eldiń kóńilin toǵaıtady. «Erim deıtin el bolmasa, elim deıtin er qaıdan shyqsyn» dep beker aıtylmaǵan.
Qurmetti qaýym!
Elbasymyz ult bolyp uıysýdyń sara jolyn siltep otyr. Endigi jerde sony júzege asyrý eldikke de syn, erlikke de sert. Endeshe, bilek sybanyp iske kiriseıik. Rahmet!