Júrsin Erman aıtys aqyndarynyń reıtıngi qalaı jasalatynyn aıtyp berdi
«Aıtysqa qomaqty júlde tigý úrdisi 1997 jyldyń qazan aıynda bastaldy. Osy ýaqytqa deıin 300-deı kóliktiń ne ózi, ne quny aqyndarǵa berildi. Besten, onnan, otyzdan kólik mingen aqyndar bar. Biz árkimge qol jaıyp, atqa mingen ákimniń qaısysynyń ulttyq ónerge jany ashıdy – soǵan baılanysty júlde taǵaıyndap kele jatqan bolatynbyz. Endigi jerde bizdiń basymyz aýyrmaıtyn boldy. «Nur Otan» partııasy aıtysty qarjylandyrýdy qamqorlyqqa aldy. Ótken jyldyń qazan aıynda ótken aıtysty, «Altyn dombyrany» da Mádenıet jáne sport mınıstrligi qarjylandyryp otyr. Onyń qupııa-syry joq. Mysaly, «Altyn dombyra» dodasyna 30 mıllıon teńge kóleminde shyǵyn shyqty. Ol tek júlde ǵana emes. Aqyndardyń jolpuly, jatyn oryny, ishetin tamaǵy, sahnanyń bezendirilýi – bárine aqsha shyǵady», - dedi Júrsin Erman.
Onyń aıtýynsha, qazylar alqasynyń eńbegi de orasan. Olarǵa da 200-300 myń teńge kóleminde aqy tólenedi.
«Jaqynda bizdiń aıtys aqyndary men jyrshy-termeshiler odaǵynyń elordadaǵy fılıaly ashylyp, soǵan kirdik. Sol jerdegi odaqtyń belsendi qyzmetkerleriniń biri – aqyn Erkebulan Qaınazarov. Buryn da «Nur Otan» partııasymen birigip, aqyndardyń jyl boıǵy aıtysqa qatysyp, alǵan oryndaryna baılanysty oryn beriledi. Bas júlde alǵan aqynǵa 100 upaı, birinshi oryn alǵanǵa 75 upaı, odan keıingilerge 50 upaı, qatysqany úshin 5 upaı berilip, reıtıng túziledi. Reıtıng osylaı qalyptasady. Erteńgi Abaı babamyzdyń qurmetine oraı ótkizilgeli otyrǵan aıtystyń aqyndary solaı anyqtaldy. Reıtıngti saıtymyz arqyly jarııalap otyramyz», - dedi Júrsin Erman.
Júrsin Erman aqyndardyń arasynda óte qýatty jastar legi qosylyp jatqanyn qosyp ótti.
Eske sala ketsek, erteń elordanyń Astana-kontsert zalynda «Adamzattyń alyby – hakim Abaı» respýblıkalyq aıtysy uıymdastyrylady .
Aıtystyń jalpy júlde qory – 10 mıllıon 400 myń teńge.