Jýrnalıstıka birtindep robottandyrylady - «Tatarınform» agenttiginiń basshysy

 ASTANA. QazAqparat - «Tatarınform» aqparat agenttiginiń bas dırektory Shámil Sadyqov elorda tórinde ótip jatqan Astana Media Week foýrmyna qatysty pikirin bildirdi, dep habarlaıdy QazAqparat tilshisi. 

«Astanaǵa alǵash ret kelip turmyn. Qala, onyń damýy tań qaldyrdy. Medıa forýmǵa qatysý barysynda jergilikti BAQ-tyń damý deńgeıi óte joǵary ekenin baıqadym. Olar barlyq trendterdi tyńǵylyqty qadaǵalap, óte belsendi jumys isteıdi eken. Dál búgin osy jerde kóterilip jatqan máseleler Reseıde de ózekti», -dedi ol QazAqparat tilshisine bergen suhbatynda. 

Sonymen qatar, agenttik basshysy qazaq tili men tatar tiliniń uqastyǵyn baıqap, tańqalǵanyn da jasyrmady. 

«Osy jerde otyryp, qazaq tilinde sóz sóıleýshilerdiń ne aıtqanyn túsindim. Bul men úshin tosyn syı boldy. Tatar men qazaq - baýyrlas halyq. Bul jerde ózimdi úıimde júrgendeı sezindim. Sebebi, sóz sóılegenderdi 99 paıyz túsindim. Bul - tańqalarlyq ári janǵa jaǵymdy áser etetin jaıt», - dedi tatarstandyq meıman. 

Sh.Sadyqov osydan bir kún buryn yntymaqtastyq keleshegin talqylaý úshin Astanadaǵy «QazAqparattyń» bas keńsesine bas suqqanyn, qos agenttik ózara is-qımyl týraly memorandýmdy qol qoıýǵa daıyndap jatqanyn aıtty. 

«QazAqparat» agenttigimen tanysyp, onyń damý deńgeıine, basshylyǵynyń durys baǵyt-baǵdar ustanyp otyrǵanyna rıza boldym. Biz yntymaqtastyq týraly memorandýmǵa qol qoıý nusqasyn qarastyryp jatyrmyz. Dos bolyp, yntymaqtastyqty jolǵa qoıǵymyz keledi. Sebebi, Tatarstan úshin, tatarlar úshin Qazaqstannyń tynys-tirshiligi óte qyzyq. Bul jerde tatarlar da kóp turady jáne osy taqyrypqa qyzǵýshylyq bar. Meniń túsingenim, Qazaqstan úshin de Tatarstan qyzyq. Sebebi, ol Reseıdiń eń qarqyndy damyp jatqan óńirleriniń biri sanalady. Demek, bizdiń agenttikterimizdiń yntymaqtastyǵy eki jaqqa da paıdaly dep oılaımyn», - dedi ol. 

Sonymen qatar, tatarstandyq meıman bolashaqta jańalyq jýrnalıstıkasy qandaı bolatyny jóninde oı órbitti.

 «Eń basty trendterdiń biri - áleýmettik jelilerdiń damýy. Bolashaqta BAQ platformaly bolady. Búgingi format áleýmettik jeli trafıgin jasaý retinde túsindiriledi jáne ol kelmeske ketedi. BAQ áleýmettik jelilerde platforma qurady. Taǵy bir jaǵdaı, Reseıge jańalyq agregattarynyń yqpaly óte zor. Menińshe, Qazaqstanda da dál sondaı jaǵdaı bar», - dedi meıman. 

Onyń aıtýynsha, bolashaqta jańalyqtardaǵy negizgi trend - aýqymdy robottandyrý bolmaq. 

«Jalpy, bolashaq jasandy ıntellektide, jańalyqqa arnalǵan platformalanǵan servısterde jáne oǵan daıyn bolý kerek. Jańalyq jýrnalıstıkasy birtindep robottandyrylyp, al avtorlyq jýrnalıstıka barynsha qyzyqty bola túsedi. Menińshe, bul trend Reseı men Qazaqstanǵa ǵana emes, búkil álemge tán», - dedi Sh.Sadyqov.