Jýrnalısterge jaýap bermeıtin memlekettik qyzmetshiler jaýapqa tartylady - mınıstr

ASTANA. QazAqparat – Jýrnalısterge jaýap bermeıtin memlekettik qyzmetshiler jaýapkershilikke tartylady. Bul týraly óńirlik merzimdi basylymdar forýmynda Aqparat jáne qoǵamdyq damý mınıstri Darhan Qydyráli aıtty, dep habarlaıdy QazAqparat tilshisi.

«Endi jýrnalıstiń saýalyna mindetti túrde jaýap beriledi. Jaýap berý merzimi qysqarady. Qazir 7 kún bolsa, endi ol 3-5 kún bolyp qysqarady. Sonymen qatar, jaýap bermeıtin memlekettik qyzmetshiler jaýapkershilikke tartylady. Munyń barlyǵy jýrnalıstiń aqparatqa qoljetimdiligin arttyrý maqsatynda jasalyp otyr», - dep málim etti Darhan Qydyráli.

Sonymen qosa, mınıstr «Mass medıa týraly» QR zań jobasy aıasynda jýrnalısterdiń áleýmettik jaǵdaıyn jaqsartý josparlanyp otyrǵanyn atap ótti.

«Qazir zań jobasy qaralyp jatyr. Onda jýrnalısterdiń jeńildikpen páter alýy, aýrýhanalarda jeńildikter paıdalanýy týraly normalar bar. Eń qarapaıymy – «Pressa» degen jazýy bar kólikti kez-kelgen jerge qoıý nemese mekemelerge kirý sııaqty kóptegen jeńildikterdi qarastyryp otyrmyz», - dep bólisti mınıstr.