Jýrnalısterge qarsy qylmystar qatań baqylaýǵa alyndy – Aqparat mınıstrligi
«BAQ ókilderiniń qaýipsizdigi men sóz bostandyǵy máselesi mınıstrliktiń baqylaýynda. Jýrnalısterge qatysty oqıǵalardyń baǵasyn tergep-tekserýden keıin quqyq qorǵaý organdary beredi dep oılaımyn. Ózderińiz biletindeı, bul máselege Memleket basshysynyń ózi erekshe nazar aýdaryp otyr. Dál qazir bolǵan faktiler boıynsha aldyn ala aqparat nemese naqty bir dáıek aıta almaımyn. Degenmen jýrnalısterdiń qaýipsizdigi máselesi mınıstrliktiń qatań baqylaýynda ekenin eske salamyn», – dedi Aqparat jáne qoǵamdyq damý vıtse-mınıstri Danııar Qadyrov Ortalyq kommýnıkatsııalar qyzmeti alańynda ótken baspasóz máslıhatynda.
Sondaı-aq vıtse-mınıstr búginde «Ashyq NQA» portalynda «Mass-medıa týraly» QR Zańy jobasynyń tujyrymdamasy talqylanyp jatqanyn eske saldy. Jurtshylyq pikirin tyńdaý 27 qańtarǵa deıin jalǵasady.
Aıta keteıik, búgin ǵana Memleket basshysy jýrnalısterge qarsy baǵyttalǵan qylmystardy muqııat tergeýdi tapsyrdy.
Prezıdent Ákimshiligi basshysynyń orynbasary – Prezıdenttiń baspasóz hatshysy Rýslan Jeldibaı málim etkendeı, qoǵamdyq qaýipsizdik pen memlekettiń bedeline nuqsan keltirý úshin jasalǵan bul zańsyz áreketterdiń oryndaýshylary ǵana emes, tapsyrys berýshilerdi de anyqtaý kerek.
Foto: baigenews.kz