Jýrnalısterdiń qaýipsizdigine basa nazar aýdarý qajet – Bıbigúl Jeksenbaı

<p>Túrkistan qalasynda &laquo;Medıakrattar medıaforýmy&raquo; ótti. BAQ ókilderi bas qosqan jıynda &laquo;Mass-medıa týraly&raquo; zań jobasy talqylandy, dep habarlaıdy <a href="Kazinform." target="_blank" rel="noopener">Kazinform.</a></p>

Medıforýmǵa aýdandyq, qalalyq gazetterdiń bas redaktorlarynan bastap oblystyq, aımaqtyq medıaholdıngterdiń dırektorlary, elimizdegi jetekshi aqparat quraldarynyń ókilderi qatysty. «Medıakratııa» qoǵamdyq birlestigi uıymdastyrǵan medıaforýmǵa belgili jýrnalıst Ǵalymjan Elshibaı moderatorlyq etti.

Alǵash bolyp baıandama jasaǵan «Aulieata» medıaholdınginiń dırektory Oralhan Dáýit aqparat salasyndaǵy reformalardyń tıimsiz tustaryn atap ótti. Óńirlerdegi medıaholdıngterdiń jumystarynda birizdiliktiń bolmaýynan ár óńirde memlekettik tapsyrystyń baǵasy da ártúrli ekenin aıtty.

Memleket jáne qoǵam qaıratkeri Darhan Myńbaı «Mass-medıa týraly» zań jobasynda birqatar jaqsy jańalyqtyń baryn alǵa tartty. Sondaı-aq asa jaýapty kezeńde jýrnalısterdiń ózara birligi óte qajet ekenin jetkizdi. 

Foto: Qaırat Zaınıshev

«Mass-medıa týraly» Zań jobasy boıynsha qurylǵan jumysshy tobynyń jetekshisi, Májilis depýtaty Janarbek Áshimjan osy ýaqytqa deıin zań jobasyna qatysty eki júzden astam usynys túskenin máldimdedi. Al senator Bıbigúl Jeksenbaı jýrnalısterdiń qaýipsizdigine basa nazar aýdarý qajettigine toqtaldy. 

«Jasyratyny joq, ózimiz jýrnalıstıkada júrgenimizde telearnanyń kamerasyn 45 myń dollarǵa, al jýrnalısti 1 myń dollarǵa ǵana saqtandyryp, shet memleketke, soǵystyń ortasyna jibergen kezderdi de kórgenbiz» - dedi ol.

Zań jobasy boıynsha jumys tobynyń músheleri Esenkúl Kápqyzy, Juldyz Ábdildá, Serik Ábikenuly Túrkistan tórinde ulttyq jýrnalıstıkanyń erteńine qandaı qaýip tónýi múmkin ekenine naqty aıǵaqtar keltirdi. Mádenıet jáne aqparat mınıstrliginiń BAQ salasyndaǵy memlekettik saıasat departamentiniń dırektory Qaınar Ahmetov jańa zań jobasynda jýrnalısterge kórsetiletin qoldaýlardy túsindirdi. 

Jıynda Ahmet ıAsaýı atyndaǵy HQTÝ rektory Janar Temirbekova, Túrkistan oblystyq qoǵamdyq damý basqarmasynyń basshysy Erlan Kúzembaev, «Syr medıa» jaýapkershiligi shekteýli seriktestiginiń bas dırektory Amanjol Ońǵarbaev jáne túrkistandyq jýrnalıster kún tártibindegi taqyryp tóńireginde oramdy oılaryn aıtyp, usynystaryn jetkizdi.

Medıakrattar medıaforýmynyń qorytyndysy boıynsha salalyq mınıstrlikke jáne Parlamentke «Mass-medıa týraly» zań jobasyna qatysty usynystar joldanatyn boldy.