Jýrnalısterdiń Etıkalyq kodeksin jetildirý qajet - Nurtóre Júsip

NUR-SULTAN. QazAqparat - Senat tóraǵasynyń orynbasary Asqar Shákirov pen senator Nurtóre Júsip Premer-Mınıstr Asqar Mamınniń atyna depýtattyq saýal joldady. Onda Jýrnalıstik ádep kodeksin jetildirý máselesi kóterildi, dep habarlaıdy QazAqparat tilshisi.

Saýal joldaǵan depýtattardyń sózine súıensek, zań aıasynda jaýapkershilik qarastyrylsa da, óńirlik BAQ-ta zorlyq-zombylyqqa ushyraǵan nemese keleńsiz áreket jasaǵan balalardyń sýretteri men olar týraly derekterdi jarııalaý máselesi kezdesip jatady. Al jeke ómirge qol suǵýshylyqtyń saldary aýyr bolýy múmkin.

«Kásibı etıkany buzýǵa jol bermeý úshin jýrnalısterdiń Etıkalyq kodeksin jetildirý qajet. Oǵan jurtshylyq ókilderin, múddeli ýákiletti organdardy, sondaı-aq, Parlament depýtattaryn jumyldyrǵan oryndy bolar edi», – dep atap ótti Nurtóre Júsip.

Aıta keteıik, atalmysh depýtattyq saýalda, sondaı-aq adam quqyqtary negizin bastaýysh synyptan bastap oqytý kerektigi aıtyldy.

«Jyl saıyn balalarǵa qatysty qylmys sany kóbeıip otyr. Bas prokýratýranyń málimetine súıensek, bıyl elimizde mundaı jaǵdaı 8 paıyzǵa ósken. Oǵan kámeletke tolmaǵandarǵa qatysty seksýaldyq sıpattaǵy faktilerdi jasyrǵany úshin qylmystyq jaýapkershiliktiń engizilýi de sebep boldy. Jalpy, 70 paıyzdan astam jaǵdaıda kámeletke tolmaǵandarǵa qatysty qylmystardy jaqyn, týys adamdar jasaıtyny alańdatady», – delingen senatorlardyń depýtattyq saýalynda.