Jýrnalısterdi oqytýda ár óńirdiń ereksheligi eskeriledi – Saıasat Nurbek
Óz sózinde Ǵylym mınıstri bul jıynǵa úlken úndeýmen, kómek surap kelip otyrnǵanyn aıtty.
«Bizdiń mınıstrliktiń qurylýynyń negizgi sebebi de, maqsaty da – joǵary bilim men jalpy kadr daıarlaý modelin ózgertý. Ózderińizge málim, men sońǵy 4-5 jylda jańa mamandyqtar, jalpy kadr daıarlaý, ásirese joǵary bilim berý salasynyń eńbek naryǵymen úılespeýi máselelerimen aınalysyp júrmin. Sondyqtan mınıstrliktiń qazirgi strategııasy, basym baǵyty – osy. Bizdiń mınıstrlik endi ár salanyń, ár óńirdiń talaptaryn, kadrlyq tapshylyqtaryn, jańa mamandyqtaryn aıqyndap, oqý baǵdarlamalaryn sol talaptarǵa, sol suranysqa úılestirip atqarýy kerek. Qazir elimizdiń 24 JOO-da jýrnalıstıka jáne medıa mamandary daıarlanyp jatyr. Dál qazir 4588 stýdent oqyp jatyr, onyń ishinde memlekettik tapsyryspen – 1323 adam bilim alýda. Bıylǵy 272 túlek oqýyn aıaqtaıdy», - dedi Saıasat Nurbek.
Mınıstrdiń aıtýynsha, eń negizgi másele – mamandandyrylǵan jýrnalıstıkalyq baǵdarlamalardyń az bolýy.
«Osy másele jyldan-jylǵa kóterilip keledi. JOO-lar da aqyryndap áreket etýdi bastady. Mysaly byltyr Eýrazııa ulttyq ýnıversıtetinde Jýrnalıstıka jáne saıasattaný jáne Áleýmettaný fakýltetteri birigip, «Sport jýrnalıstıkasy» mamandyǵyn ashty. Oǵan qosa tsıfrlyq medıany basqarý mamandyǵy ashyldy. Astana IT ýnıversıteti byltyr «Tsıfrlyq jýrnalıstıka» mamandyǵyn ashyp, qazir «Big data jýrnalıstıka» mamandyqtaryn pysyqtap jatyr. Jalpy 24 oqý ornynyń basym kópshiligi – memlekettik ýnıversıtetter, ózimizdiń óńirlik oqý oryndary. Endi oqý-ádistemelik birlestikterdiń jumystaryn pysyqtaýda sol óńirdegi erekshelikterdi eskere otyryp, jýrnalıstıka baǵdarlamalaryn pysyqtasaq. Mysaly Qostanaı óńirinde agrojýrnalıstıka, aýyl sharýashylyǵyna mamandanǵan jýrnalıster qajet», - dedi S. Nurbek.
Sonymen birge, memlekettik standartty ózgertkende birinshi kezekte – dıssertatsııalar men dıplomdyq jumystardyń ǵylymı jetekshiligin tek qana ǵylymı dárejesi barlar ǵana emes, ındýstrııadaǵy myqty mamandar da júrgize alady.
«Sabaq berýdi de tek qana doktorlar men PhD ıegerleri emes, sol ındýstrııanyń ishinen shyqqan tájirıbesi bar adamdarǵa ruqsat etemiz. «Endowed professor» uǵymy shetel tájirıbesinde bar. Taǵy bir mańyzdy nárse – oqytýshylarǵa baılanysty. Iá, «Ǵylymı jýrnalıstıka», «Big data» dep jańa oqý baǵdarlamasyn jasaı alamyz. Biraq oqytýshy tabylmaıdy. Sol burynǵy oqytýshylar sabaqtyń atyn ózgertkenimen, mazmunyn baıaǵydaı qaldyrady. Bizdiń janaıqaıymyz, úndeýimiz osy, sala mamandarynan JOO-ǵa kómek qajet», - dedi Saıasat Nurbek.
Aıta keteıik, Astana Media Week 26-28 qazan kúnderi ótedi. Onda 150 otandyq jáne halyqaralyq spıkerdiń qatysýymen 30-dan astam is-shara ótedi. Jyldyń basty taqyryby - «Jańa dáýir – jańa medıa». Taqyryp jobanyń úsh qundylyǵyn ashýy tıis: jańa dáýirdegi senim, jańa ýaqyttaǵy kásibılik jáne BAQ-tyń úzdiksiz damýy.
Birinshi kúni AMW qatysýshylary paneldik sessııa aıasynda Ázerbaıjan, Ózbekstan jáne Qyrǵyzstan sııaqty Ortalyq Azııa buqaralyq aqparat quraldarynyń ókilderimen ortaq syn-qaterlerge ortaq jaýaptardy qalaı tabýǵa bolatynyn talqylaıdy.
Sonymen qatar, búgin Astana Media Week aıasynda Nickelodeon telearnasy men Turanews.kz jańa aqparat portalynyń tusaýkeseri ótedi.
Astana Media Week dástúrli túrde baspasóz, radıo, Internet-jýrnalıstıka salasyndaǵy úzdik jetistikteri úshin «Úrker» syılyǵynyń saltanatty rásimimen aıaqtalady.