Jýrnalısterdi daıarlaý júıesin ózgertemiz - mınıstr Abaev

ASTANA. QazAqparat - Búgin QR Aqparat jáne kommýnıkatsııalar mınıstri Dáýren Abaev jýrnalısterdi daıarlaý júıesin ózgertýge ýáde etti, dep xabarlaıdy QazAqparat tilshisi.

«Men bul máseleni ózim de baıqap júrmin. Jýrnalıstıka salasynda bilim berý sapasyna qatysty kóptegen suraqtar týyndap jatyr. Negizi, bári oryndy. Ýnıversıtetterde sabaq berip júrgen jýrnalıstıka kafedralarymen birge osy saladaǵy basshylardy biriktirip, bul jumysty naqty bir júıege keltirýimiz kerek. Biz ony qolǵa alamyz. Oǵan ýáde etemin. Jyldyń sońyna deıin osy máselege qatysty naqty bir xabar beremiz dep oılaımyn», - dedi D.Abaev xalyqqa esep berý kezdesýinde.

Mınıstrdiń aıtýynsha, QR Bilim jáne ǵylym mınıstrligimen birlese otyryp, ádistemeni ózgertý jaıy da qaralady.

«Bizge sapaly jýrnalıstıka qajet. Al sapaly jýrnalıstıkaǵa sapaly ustazdar qajet, sapaly ádisteme bolýy kerek. Jýrnalısterdiń sany az bolsyn, biraq sapasy joǵary bolǵany durys. Árıne, basqa salada júrgen daryndy jýrnalıster de bar. Jazýy da, stıli de jaqsy. Ondaı mamandardy da ortaq jumysqa tartý qajet», - dedi D.Abaev.

Osy oraıda mınıstr aǵylshyn oqýlyqtaryn qazaq tiline aýdarý sharalaryn da eske aldy.

«Mysaly, medıa etıkaǵa arnalǵan kitap alǵash ret aǵylshyn tilinen qazaq tiline aýdaryldy. Biz jyl saıyn bir-eki kitaptan aýdaryp otyramyz. Ol da bir kómegin tıgizedi dep oılaımyn», - dep atap kórsetti D.Abaev.

Aıta keteıik, kezdesý kezinde Dáýren Abaev jýrnalısterdi baspanamen qamtýdyń mashaqaty týraly aıtyp berdi.

Sondaı-aq onyń aıtýynsha, qazirgi kezde BAQ-tyń jańa reıtıngisin ázirleý jumystary atqarylyp jatyr.