Jýrnalıster Respýblıkalyq ǵarysh baılanysy ortalyǵyna saıahattady

ASTANA. QazAqparat - Qazaqstan ǵarysh baılanysy ulttyq operatory - «Respýblıkalyq ǵarysh baılanysy ortalyǵy» AQ (RǴBO) búgin qazaqstandyq jýrnalısterdi Aqkól qalasyndaǵy KazSat ǵarysh apparattaryn basqarý jerústi keshenine saıahatqa shaqyrdy, dep habarlaıdy «QazAqparat» HAA tilshisi.

BAQ ókilderin qarsy alǵan «RǴBO» AQ prezıdenti Vıktor Lefter bul shara Jerdiń tuńǵysh jasandy seriginiń ǵaryshqa ushyrylýynyń 60 jyldyǵyna arnaıy uıymdastyrylyp jatqanyn tilge tıek etti.

«Búgingi tańda Qazaqstandaǵy baılanys operatorlarynyń barlyǵy derlik KazSat-2 jáne KazSat-3 baılanys spýtnıkterine ótken. Sheteldik spýtnıkterdi paıdalaný nebári 2 protsentti quraıdy. 29 mlrd teńgeniń ımportynyń ornyn otandyq ónim arqyly toltyryp otyrmyz», - dep málimdedi V. Lefter.

Sharada jýrnalısterge «Aqkól» ǵarysh baılanysy ortalyǵynyń jumysy, ortalyq aýmaǵynda turatyn qyzmetkerlerge qandaı áleýmettik jaǵdaılar jasalǵany kórsetildi. Jýrnalıster radıomýzeıdiń kásiporyn mamandary jasaǵan tańǵajaıyp eksponattaryn tamashalady.

RǴBO baspasóz qyzmetiniń habarlaýynsha, keleside Almaty oblysynyń Kókterek aýylynda ornalasqan jer ústi rezervtik basqarý keshenine jýrnalıster saıahatyn uıymdastyrý josparlanyp otyr.