Jýrnalıster bir kún ishinde áskerı daǵdylardy úırendi

ALMATY. QazAqparat - Qurlyq áskerleri Áskerı ınstıtýty oqý-jattyǵý ortalyǵynda Almaty qalasynyń BAQ ókilderi úshin qyzyqqa toly baspasóz týry uıymdastyryldy, dep habarlaıdy QazAqparat Qorǵanys mınıstrligine silteme jasap.

Belsendi jáne salaýatty ómir saltyn, áskerı-qoldanbaly sport túrlerin dáripteý jáne BAQ ókilderimen ózara is-qımyldy ári qaraı sapaly nyǵaıtý baspasóz týrynyń negizgi maqsaty bolǵan.

«Jýrnalıster úshin úsh kezeńdi áskerı-sporttyq oıyn uıymdastyryldy. Olar jeke qorǵanys quraldaryn kııý, kedergiler jolaǵynan ótý, oqý granatalaryn laqtyrý, sondaı-aq qarýmen nysana kózdeý baq synasty», delingen habarlamada.

Áskerı-sporttyq oıynǵa 9 qurama komanda qatysty. Olardyń árqaısysyna 4 jýrnalıst pen áskerı ınstıtýttyń 1 kýrsanty kirdi.

Saıys nátıjeleri boıynsha «Habar» jáne «Eýrazııa» telearnalarynyń qurama komandasy birinshi oryndy, «Qazsport» telearnasynyń komandasy ekinshi oryndy jáne «Ulan» gazetiniń komandasy úshinshi oryndy enshiledi. Baspasóz týryna qatysýshylar gramotalarmen jáne syılyqtarmen marapattaldy.