Jýrnalıster arasyndaǵy respýblıkalyq "Damý" baıqaýynyń jeńimpazdary anyqtaldy
Ony uıymdastyrýshylar búgin Almatyda baıqaýdyń alǵashqy jeńimpazdaryn marapattaý rásiminde aıtty.
"QR Údemeli ındýstrııalyq-ınnovatsııalyq memlekettik damý baǵdarlamasyn júze asyrý aıasynda ekonomıka men qarjy salalaryndaǵy úzdik saraptamalyq materıaldarǵa jarııalanǵan bul baıqaýǵa elimizdiń túkpir-túkpirinen 120-daı jarııalanym kelip tústi. Alaıda olardyń ishinde ındýstrııalyq damýǵa arnalǵan materıaldar az boldy. Sondyqtan da qazylar alqasynyń sheshimimen olardyń negizgi kezeńge - 50, al aqtyq synǵa 28-i ǵana jiberildi", - deıdi Qazaqstan jýrnalıster odaǵynyń basqarma tóraǵasy Seıitqazy Mataev.
"Qazaqstannyń damý banki" AQ-nyń basqarma tóraǵasy Ǵalym Isqalıev jeńimpazdarǵa dıplom tapsyrý kezinde bul baıqaýdyń aldaǵy ýaqytta dástúrli sharaǵa aınalatynyn jetkizdi. Syıaqysynyń kólemi jaǵynan (700 myń teńge) Prezıdent stıpendııasy men grantynan keıingi eń úlken baıqaý bolyp otyrǵan bul baıqaýda jeńimpazdar 4 atalym boıynsha marapattaldy. Onda "Qazaq tildi merzimdi basylymdar arasynan "Túrkistan" gazetinen Esengúl Kápqyzy, "Munaıly Astana" (Atyraý) gazetinen Quttygereı Smadııar, orys tildi merzimdi basylymdar arasynan "Delovaıa nedelıa" gazetinen Ulbolsyn Qojantaeva úzdik dep tanyldy. Mundaı qurmetke qazaq tildi teleradıo arnalarynyń qyzmetkerlerinen "Qazaqstan" RTRK" AQ-nan Nurtas Kósherov pen QR Prezıdenti teleradıokesheniniń shyǵarmashylyq ujymy, al orys tildi teleradıo arnalarynan "Mır" memleketaralyq teleradıokompanııasynan Anastasııa Solntseva jáne "Qazaqstan" RTRK" AQ-y redaktorlary Sáıgerim Orazalıeva men Araılym Rashıtova ıe boldy.