Jýrnalıster arasynda Nurtileý Imanǵalıulyn eske alýǵa arnalǵan voleıbol týrnıri bastaldy

NUR-SULTAN. QazAqparat – Elordada voleıboldan BAQ ókilderi arasyndaǵy «BAQ lıganyń» birinshi maýsymy bastaldy, dep habarlaıdy QazAqparat tilshisi.

Bul maýsym qazaq televızııasynyń maıtalmany Nurtileý Imanǵalıulyn eske alýǵa arnalǵan.

Ony «Qazaqstan» RTRK, L.Gýmılev atyndaǵy Eýrazııa ulttyq ýnıversıteti jáne Qazaqstan voleıbol federatsııasy uıymdastyryp otyr.

«Árıne, Eýrazııa ulttyq ýnıversıteti mundaı ıgi bastamalardy qashanda qoldaıdy. Muny sport salasyna degen qulshynys, álemdi jaılaǵan derttiń qamalyn buzatyn, salamattyqqa ákeletin úlken ynta dep qabyldadyq. Árıne, qazaqta «Óli rıza bolmaı, tiri baıymas» deıdi. Nurtileý Imanǵalıuly, óziniń telejýrnalıst retindegi tulǵasyn ózi jasaǵan, ol da salamatty ómir saltyn erekshe qadirledi. Bizdiń jastarymyzdyń da formada bolýy óte mańyzdy. Nurtileý aǵa óz zamanynda telejýrnalıstıka salasyndaǵy kóp problemany kóterdi, kóp telejobalardy júzege asyrdy. Bul – búgingi jastar úshin úlken motıvatsııa, adam oılaǵanyn júzege asyra alady. Onymen pikirlesken kezderimiz de boldy, ultqa bolsyn, jastarǵa bolsyn degen adam edi. Ondaı azamattardy árqashan eske alyp otyrýymyz kerek», - dedi EUÝ áleýmettik-mádenı damý jónindegi prorektory Dıqan Qamzabekuly «Eýrazııa» sport kesheninde maýsymnyń ashylý saltanatynda.

Nurtileý Imanǵalıulyn eske alý týrnıri jónindegi bastamany «Qazaqstan» RTRK basqarma tóraıymynyń orynbasary Erjanar Ásheıhan kótergen bolatyn.

«Ózderińiz biletindeı, voleıbol –arıstokrattyq oıyn, komandalyq rýh qalyptastyratyn oıyn. Ony Nurtileý Imanǵalıulyn eske alý týrnıri dep atadyq jáne aldaǵy ýaqytta turaqty ótkizýdi josparlap otyrmyz. Eń basty maqsat – bir-birimizben aralassaq degen oı. Sondyqtan aptanyń bir kúnin bir-birimizben jaqyn tanysýǵa arnaýdy uıǵardyq. Tek qana jeńisti kúnderde jolyǵaıyq», - dedi E. Ásheıhan.

Birinshilik 28 maýsymda atalyp ótetin Jýrnalıster kúnine deıin jalǵasady jáne onda 8 komanda – «2-bap. Tsenzýra», «7 arna», «Atameken business channel», «Qazaqstan TV», «Qazaq radiolary», «QazAqparat agenttigi», «Qazmedıa ortalyǵy» jáne «Habar agenttigi» ujymdary saıysqa túsedi.

Aıta keteıik, 2016 jyldyń 10 jeltoqsanynda baıraq kótergen «BAQ lıga» – Qazaqstan BAQ ókilderin biriktirip, redaktsııalar arasyndaǵy áriptestik tatýlyqty arttyrýǵa arnalǵan joba.

Búginge deıin BAQ league Qazaqstannyń aqparat quraldary arasynda fýtbol dodalaryn ótkizip keldi.

Shaǵyn fýtboldan 8 maýsym ótip, oǵan elimizdiń 40-qa jýyq redaktsııasynan 500-ge tarta jýrnalıst qatysty.

Endi «BAQ lıga» fýtboldan bólek, BAQ ókilderi arasynda voleıbol chempıonattaryn da qolǵa alyp, turaqty túrde uıymdastyrýdy josparlaıdy.