Jýrnalıst Toqbergen Ábıev kásipkerden 50 mln teńge bopsalaǵan - Antıkor

ASTANA. QazAqparat - Jýrnalıst Toqbergen Ábıev Youtube-arnasynda shyndyqqa sáıkes kelmeıtin beınejazbalardy joıý úshin kásipkerden asa iri mólsherde aqsha bopsalady degen kúdikke ilindi. Bul týraly QazAqparat Antıkorǵa silteme jasap habarlaıdy.

«Ótken jyly 14 jeltoqsanda Toqbergen Ábıev 50 mıllıon teńgemen ustalyp, sottyń sanktsııasymen 2 aı merzimge qamaýǵa alyndy. Budan basqa, Ábıev memlekettik organdar qyzmetkerleri men azamattardy adastyrý maqsatynda «Sybaılas jemqorlyqqa qarsy kúres departamenti» JShS jeke zańdy tulǵasyn tirkegeni anyqtaldy. Atalǵan uıymnyń basshysy bolyp kórinip, sol arqyly bılik ókiliniń beınesin jasaı otyryp, Ábıev kásipkerler men memlekettik organdardyń laýazymdy adamdarynan óziniń jeke múddesi úshin is-áreketter jasaýdy, sondaı-aq zańda belgilengen tártipti buza otyryp aqparat pen materıaldar berýdi talap etti», - delingen Antıkor habarlamasynda.

Agenttiktiń habarlaýynsha, Ábıev tek ózine-ózi qyzmet etý sebepterin kózdeı otyryp, aqshalaı syıaqylar úshin jeke tulǵalarǵa óz uıymy qyzmetkeriniń qyzmettik kýálikterin berip, olardy bılik ókiliniń mártebesi týraly jańylystyrdy. Alaıda, Ábıevtiń qyzmeti quqyq qorǵaý organdarynyń jumysymen eshqandaı baılanysty emes.

Ábıevtiń basqa da osyǵan uqsas qylmystarǵa qatysy týraly aqparat tekserilýde.

Eske salsaq, 2013 jyly jýrnalıst Toqbergen Ábıev qoǵam men bıliktiń nazaryn aýdartý úshin óziniń joǵalýyn ózi uıymdastyrǵan edi. Keıin «Ádil sóz» qory óziniń joǵalýyn ózi uıymdastyrǵan T.Ábıevti «qara tizimge» engizdi.