Júrgizýshi quqyǵynan aıyrylǵanyna qaramastan kólik basqarǵan 1,5 myń adam ustaldy - ІІM
«Respýblıka boıynsha «Ýchaske» jáne «Quqyqtyq tártip» keń aýqymdy jedel-aldyn alý is-sharalary júrgizilip, oǵan 16 myńnan astam polıtsııa qyzmetkeri men ulandyqtar jumyldyryldy. Úsh kún ishinde 1 260 qylmys tirkeldi. Onyń 858-i kezekshi táýlikte ashyldy. Tyıym salynǵan zattardy zańsyz saqtaǵany jáne alyp júrgeni úshin 180 adam, onyń ishinde 78-i esirtki úshin, 54-i atys qarýy úshin, 31-i sýyq qarý úshin ustaldy. Esepte turǵan 39 myńnan astam adam tekserildi. Olarǵa qoıylǵan shekteýlerdiń 392 ret buzylǵany anyqtaldy», - dedi basqarma bastyǵy mınıstrlikte ótken brıfıngte.
Onyń dereginshe, úsh kún ishinde 9 myńnan astam qaraýsyz qalǵan úı, 17 myńnan astam saıajaı jáne 13 myńǵa jýyq páter tekserildi.
«29 myńnan astam ákimshilik quqyq buzýshylyqtyń joly kesildi. Olardyń ishinde usaq buzaqylyqtyń – 547, alkogoldik ishimdikterdi ishýdiń nemese qoǵamdyq oryndarda mas kúıde júrýdiń – 3 300, tynyshtyqty buzýdyń – 1 245, qorǵaý nusqamalaryn buzýdyń – 152, ákimshilik qadaǵalaýdy buzýdyń – 63, qarsy jolaqqa shyǵýdyń – 201, kólik quralyn mas kúıinde basqarýdyń 274 faktisi bar. 4 390 jaıaý júrginshi ereje buzǵan. Sonymen qatar, 1,5 myń adam júrgizýshi quqyǵynan aıyrylǵanyna qaramastan kólik basqarǵan», - dedi Baýyrjan Maksımov.