Júrgizýshiniń alkogol nemese esirtki qabyldaǵanyn kýálandyrý elektrondy formatta júrgiziledi

ASTANA. QazAqparat – Júrgizýshilerdiń psıhoaktıvti zatty paıdalaný faktisi men mas kúıin medıtsınalyq kýálandyrý elektrondy formatqa kóshiriledi, dep habarlaıdy QazAqparat Densaýlyq saqtaý mınıstrligine silteme jasap.

Jobany Densaýlyq saqtaý mınıstrligi, Bas prokýratýranyń Quqyqtyq statıstıka jáne arnaıy esepke alý komıteti jáne Іshki ister mınıstrligi «Respýblıkalyq medıtsınalyq ınstıtýt» seriktestiginiń qatysýymen júzege asyrady.

Bul ákimshilik is júrgizýdiń biryńǵaı tizilimimen elektrondy formattaǵy derek almasýdy jáne quqyq qorǵaý organdary men medıtsınalyq mekemelerdiń arasyndaǵy aqparatty sınhrondaýdy qamtıdy.

Júıelerdi ıntegratsııalaý medıtsınalyq kýálandyrýǵa jiberý jáne medıtsınalyq kýálandyrý aktisin alý josparynda qaǵazsyz qujat aınalymyn iske asyrýǵa múmkindik beredi.

Pılottyq joba Pavlodar oblysynda iske qosyldy, onyń sheńberinde 2000-nan astam elektrondy baǵyttar men medıtsınalyq kýálandyrýdyń elektrondy aktileri qalyptastyryldy. Jobanyń pılottyq kezeńine Almaty, Soltústik Qazaqstan jáne Jambyl oblystary da daıyn.

Budan basqa, jol-kólik oqıǵalary kezinde Eýropalyq hattamany aldaǵy ýaqytta engizý sheńberinde saqtandyrý jaǵdaılaryn resimdeý kezinde derekterdi almasý úshin Memlekettik kredıttik bıýronyń servısterimen medıtsınalyq kýálandyrýdyń elektrondyq júıesin ıntegratsııalaý júzege asyryldy.

Integratsııa – ákimshilik protsesterdi tsıfrlandyrýdyń mańyzdy qadamy, bul derek almasý ýaqytyn qysqartýǵa, ashyqtyqty qamtamasyz etýge jáne júrgizýshilerdi medıtsınalyq kýálandyrý salasyndaǵy sybaılas jemqorlyq qaýipterin azaıtýǵa múmkindik beredi.