«Júrgizýshi ornyn robot basady» - baspasózge sholý
***
«Egemen Qazaqstan» gazetiniń jazýynsha, Aqmola oblysynda balalardyń túngi «joryqtary» kóbeıip barady. Ony polıtsııa qyzmetkerleri júrgizgen bir túndik jedel aldyn alý sharalary barysynda 80-nen astam jasóspirimniń ishki ister bólimderine jetkizilgeni aıǵaqtaı tústi. Aqmola oblystyq ishki ister departamenti baspasóz qyzmetiniń habarlaýynsha, 13 jasóspirimniń qoǵamdyq oryndarda alkogoldi ishimdik ishkeni, 14 balanyń usaq buzaqylyq jasaǵany jáne 49 jasóspirimniń túngi mezgilde ózderiniń zańdy ókilderiniń baqylaýynsyz júrgeni úshin ustalǵan.
«Sondaı-aq, túngi ýaqytta jasóspirimdi mas bolý jaǵdaıyna jetkizgen bir adam men kóńil kóterý oryndaryna kirýine ruqsat bergen eki kásipker ákimshilik jaýapkershilikke tartyldy. «Túngi qaladaǵy balalar» jedel aldyn alý sharalaryn uıymdastyrýshylar 21 jasqa tolmaǵandarǵa alkogoldi ishimdik satýdyń 4, al shylym satýdyń 6 faktisin anyqtaǵan. Polıtsııa qyzmetkerleri 32 jasóspirim men 35 otbasyn ishki ister bólimderiniń arnaıy esebine tirkep otyr. Joǵaryda atalǵan jaǵdaılardyń barlyǵy bir túnde oryn alǵanyn eskersek, qoǵam oılanatyndaı keleńsizdik ekeni belgili», - delingen « Jasóspirimderdiń túngi júrisi» atty materıalda.
Bas basylymda qazaqtyń kúmiskómeı ánshisi, Uly Dalanyń bulbul úni, KSRO halyq ártisi Bıbigúl Tólegenovamen aradaǵy suhbat kópshilik nazaryna usynylyp otyr. «El birligin nasıhattap, memleketimizdiń nyǵaıýy men ulttar dostyǵynyń beriktigin baıandy etetin ıgi sharalar bizde udaıy ótkizilip turady. Halqymyzdyń aýyzbirshiligi men el tynyshtyǵyna mundaı basqosýlar men memlekettik ıdeologııalyq baǵdarlamalardyń qosary kóp. Bizdegi beıbit ómirdiń kilti de osynda bolsa kerek.
Bıyl elordamyz Astanada «Máńgilik El - bolashaǵy birtutas el» atty patrıottar forýmy bolyp, onda elimizdiń ár túkpirinen Otanyn qurmet tutyp, ultyn súıetin ul-qyzdar, óner jáne mádenıet qaıratkerleri, qazaq rýhanııaty men ekonomıkasyna zor úles qosyp júrgen tarlandarymyz, memleketimizde tatý-tátti ómir súrip jatqan barsha ult ókilderiniń atynan kelgen patrıottar qatysty. Kisini bir qýantatyny - Qazaqstandaǵy dostyq pen baýyrlastyqqa, elimizdiń damýy men ilgeri basýyna osy ulan-baıtaq jerimizdi meken etip jatqan barlyq ult ókilderiniń shynaıy atsalysyp otyrǵandaryna kýá bolý jáne adamzattyq uly mindet jolynda birlese eńbektenýdi seziný eken», - deıdi B. Tólegenova. Bul suhbat basylymda «Máńgilik El» - birtutastyǵymyzdyń rýhanı ózegi» degen taqyryppen berilgen.
***
«Bolashaqta adamdar elektr qýaty úshin bir tıyn tólemeıtin zaman týady! Sondaı-aq kólikter tolyǵymen robottardyń basqarýyna kóship, «temir tulparlardy» adamdardyń júrgizýi qylmysqa teńelýi múmkin: sóıtip, jol-kólik oqıǵalaryna soqtyratyn «adamı faktorlar» joıylady.
Aıtqandaı, keleshekte adamdardyń joǵary bilim alýy da tegin bolýy yqtımal. Osy jáne basqa da qyzyqty ǵylymı joramal-gıpotezalar Investıtsııalar jáne damý mınıstrligi men Tehnologııalyq damý jónindegi ulttyq agenttik uıymdastyrǵan jıynda aıtyldy», - dep jazady «Aıqyn» gazeti búgingi sanyndaǵy « Júrgizýshi ornyn robot basady» atty maqalasynda.
Burynǵy bankır, qazir elimizdiń jetekshi tehnıkalyq ýnıversıtetinde dáris beretin professor, «aqyldy» avtokólikter sektoryndaǵy otandyq joǵary tehnologııaly jobanyń quryltaıshysy jáne bas dırektory Rýslan Egembaev álemdik «ınnovatsııalyq jáne joǵary tehnologııalyq kóshtiń» qaıda bara jatqanyn baıandap berdi.
- Ashyǵyn aıtýymyz kerek, aldaǵy jarty ǵasyrda álemdegi memleketter, kompanııalar ne ınnovatsııaǵa den qoıyp, joǵary tehnologııalaryn damytady, ne quryp, tarıh qoınaýyna ketedi. Basqa jol joq! Siz ben biz qazir biregeı, fantastıkalyq ýaqytta ómir súrýdemiz. Adamzattyń jylnamaǵa jazyp túsirilgen 5 myń jyldyq tarıhynda mundaı kezeń bolmaǵan! - deıdi ol.
Osy basylymda «Ata-analar aralas emhanadan nege qaýiptenedi?» degen maqala jarııalandy. Sońǵy on jylda elimizdegi emhanalar aralas tıpke aýysýda jáne ol jerlerde naýqastardy jalpy tájirıbelik dáriger, ıaǵnı otbasylyq dáriger qabyldaıtyn bolady. Medıtsına salasynyń mamandary bul damyǵan elderdiń tájirıbesi ekenin aıtyp baǵýda. Alaıda mundaı tájirıbege kóńili tolmaı, qarsylyq bildirip júrgen ata-analar da bar. Olar endi úlkendi de, kishini de bir medıtsınalyq mekemede qabyldaıtynyna, oǵan alyp baratyn balalarynyń densaýlyǵyna alańdaýly. Al buǵan alańdaýǵa negiz bar ma? Shynymen, balanyń densaýlyǵyna qaýiptilik bar ma?
Máselen, balalar hırýrgııasynyń atasy atanǵan professor Kamal Ormantaev mundaı júıeni qup kórmeıtinin aıtady. Úlken kisiler men balalardy bir emhanada qaraý durys emes degen oıda. - Qazir otbasy dárigeri barlyq aýrýdy emdep jatyr. Negizinde, 14 myń aýrýdyń túri bar, al bir ǵana dáriger ol aýrýlardyń astaryn bilmeıdi. Búginde maǵan ata-analar balalarynyń syrqatyna em surap kelip jatyr. Otbasy dárigeriniń bilimi tómen bolǵandyqtan, balalaryn, ásirese, jańa týǵan nárestelerin kórsetýge qorqady. Sol sebepti pedıatr izdeıdi, - deıdi medıtsına ǵylymynyń doktory, akademık, dáriger-pedıatr Kamal Ormantaev.
***
«Kazahstanskaıa pravda» gazetiniń jazýynsha, áýe nysanalaryn aıqyndaý, basyp alý boıynsha Áýe qorǵanysy kúshteriniń (ÁQK) kezekshi kúshteri men quraldarynyń ázirligi men qabilettiliginiń jaı-kúıine kenetten tekserý júrgizildi. Tosynnan tekserilýge MıG-31 joıǵyshynyń ekıpajdary, Mı-17-niń 2 tikushaǵy men TL-2000-nyń 3 ushý apparaty, sondaı-aq, áýe shabýylyna qarsy qorǵanys bólimderi, bólimsheleri jáne Áskerı-áýe kúshteriniń ekıpajdary tartyldy. Ushaqtar (oqý nysanalary) Áýe qorǵanysy kúshterine belgisiz berilgen baǵdarlar boıynsha elimizdiń ár núktesinen ushyp shyqty. Kenetten tekserý barysynda taktıkalyq-jaýyngerlik tapsyrmalardy oryndaı otyryp, ÁQK-niń bólimshelerin dabyl boıynsha kóterýmen is-qımyldardy pysyqtaýǵa erekshe kóńil bólindi.