Júrgizýshi kýáligin satyp almaq bolǵan Semeı turǵyny alaıaqqa aldandy

SEMEI. QazAqparat – Semeı qalasynyń turǵyny júrgizýshi kýáligin jasatpaq bolyp alaıaqqa aldanyp qalǵan, dep habarlaıdy QazAqparat tilshisi.

ShQO polıtsııa departamenti baspasóz qyzmetiniń málimetine súıensek, «102» jedel arnasyna 21 jastaǵy qala turǵyny habarlasqan.

Onyń aıtýynsha, Dýlatov kóshesiniń boıynda ózin áńgimege tartqan beıtanys jigit júrgizýshi kýáligin jasap bere alatynyn aıtyp, 100 myń teńge suraǵan.

Buǵan sengen azamat alaıaqqa suraǵan aqshasyn bere salǵan.

«Jedel-izdestirý sharalaryn júrgizgen polıtsııa qyzmetkerleri kóp uzamaı kúdiktini ustady. Ol 22 jastaǵy jergilikti turǵyn bolyp shyqty. Kinásin moıyndaǵan er adam aqshany óz qajettilikterine jumsap úlgergen», - dep habarlady vedomstvo ókilderi.

Qazirgi ýaqytta atalǵan fakti boıynsha Qazaqstan Respýblıkasy Qylmystyq Kodeksiniń 190-baby 1-bóligine sáıkes sotqa deıingi tergeý amaldary bastaldy.