Júnnen ıtkóılek toqıtyn volonterler shala týǵan nárestelerdiń ómiri úshin kúresýde

NUR-SULTAN. QazAqparat – «28 ilmek» volonterlik uıymnyń múshesi Láılá Smaǵulova júnnen toqylǵan ıtkóılekter shala týylǵan nárestelerdiń ómirin qalaı qutqaratyny týraly aıtty, dep habarlaıdy QazAqparat tilshisi.

«Biz shala týǵan sábılerge arnap júnnen ıtkóılek, shulyq toqımyz. Sábıler kishkentaı bolǵandyqtan, kúsh-qýattary az bolady. Al júnnen toqylǵan ıtkóılek olardyń denelerin titirkendirip, kóp qımyldaýǵa jáne boıyna qan júrýine sebepshi bolady. Odan keıin belgili bir dınamıka paıda bolyp, ómir súrý múmkindigi artady. Birinshiden, taza júnnen toqylǵandyqtan, sábı tońyp qalmaıdy. Ekinshiden, sábılerdiń terisi názik bolǵandyqtan, júnnen toqylǵan ıtkóılek olardyń qozǵalysyn arttyrady», - deıdi Láılá Smaǵulova Nur-Sultan qalasynda respýblıkalyq «Birgemiz» front-keńsesiniń ashylýynan keıin bergen suhbatynda.

Ol medıtsına qyzmetkerlerimen tyǵyz baılanysta ekenderin aıtty.

«Bizde jaqynda bal boldy. Sol kezde QR Densaýlyq saqtaý mınıstri men dárigerler bizdi áriptesteri retinde sanaıtyndaryn aıtty. Sonda biz jaı ǵana toqýmen aınalyssaq ta, medıtsına qyzmetkerleriniń qataryndamyz», - deıdi ol.

Bul – «28 ilmek» aınalysatyn jalǵyz kómek túri emes.

«Bizde perzenthanadan shyǵyp qoıǵan sábılerge kútim kórsetetin medbıkelerdi daıyndaıtyn joba bar. Bul massaj jáne taǵy da basqa emdik–saýyqtyrý jumystary. Bul jumystyń negizin qalaýshy – «28 ilmek» jobasynyń múshesi Latıf Parpıev. Ol balalardy ońaltý jáne emdeýmen aınalysatyn patronajdy medbıkelerdi daıyndaıdy», - deıdi volonter.

Sondaı-aq, Láılá Smaǵulova bul joba týraly oı neden týyndaǵanyn aıtty.

«Meniń qurbym, fotoreportaj jasaýshy Karla Nur perınataldy ortalyqty sýretke túsirip júrgen kezde júnnen toqylǵan shulyq kıip jatqan sábıdi kórgen. Bul shamamen 6-7 jyl buryn bolǵan jaǵdaı. Ol dárigerlerden sábı ne sebepti júnnen toqylǵan shulyq kıip jatqanyn suraıdy. Dárigerler oǵan bárin túsindirip aıtqan eken. Osy jaǵdaıdan keıin ol dál osy jolmen basqa sábılerge de kómektesý týraly oılaıdy. Ol osy jobanyń negizin qalady. Qazirgi ýaqytta bul ıdeıa Qazaqstan aýmaǵynda ǵana emes, álem boıynsha iske asyp jatyr. Biz toqýǵa kerekti zattardy ózimiz satyp alyp, toqyp bolǵannan keıin perınataldy ortalyqtarǵa tegin taratamyz», - deıdi ol.