Jumysynan aıyrylǵan 33,5 myńǵa jýyq adam áleýmettik saqtandyrý qorynan tólem aldy

ASTANA. QazAqparat - Jyl basynan beri Memlekettik áleýmettik saqtandyrý qorynan (budan ári – MÁSQ) jumysynan aıyrylýyna baılanysty áleýmettik tólem alýshylardyń sany 33,5 myń adamdy qurady. Bul rette bıyl 14,3 myń adamǵa tólem alǵash ret taǵaıyndaldy, dep habarlaıdy QazAqparat.

Qoldanystaǵy zańnamaǵa sáıkes jumystan bosatylǵan jumyskerler mindetti áleýmettik saqtandyrý júıesine qatysý ótiline jáne sońǵy 24 aıdaǵy tabysyna baılanysty 1 aıdan 6 aıǵa deıin jumysynan aıyrylýy boıynsha áleýmettik tólemder alady.

Eńbek jáne áleýmettik qorǵaý mınıstrliginiń málimetinshe, tólem joǵalǵan kiristiń 45%-yna deıingi mólsherde MÁSQ qarajaty esebinen júzege asyrylady.

Tólem taǵaıyndaý úshin jumystan bosatylǵan jumyskerge:

- eGov.kz portalynda avtorızatsııalaný;

- «Jumysqa ornalastyrý jáne jumyspen qamtý» bóliminde «Jumys izdeýshi adamdardy tirkeý» qyzmetin tańdaý;

- onlaın-qyzmetke tapsyrys berip, barlyq joldardy toltyrý jáne oǵan ETsQ-men qol qoıyp, ótinimdi jiberý qajet;

- bir kún ishinde turǵylyqty jerińizdegi halyqty jumyspen qamtý ortalyǵy (budan ári – HJQO) bos jumys oryndaryn usynady;

- eger jumys tabylmasa, 3 jumys kúni ishinde qashyqtyqtan jumyssyz mártebesi beriledi (qajet bolǵan jaǵdaıda sizge HJQO qyzmetkeri qosymsha aqparat jınaý úshin habarlasady);

«Bul qyzmetti onlaın rejıminde Elektrondyq eńbek bırjasy (enbek.kz) arqyly da alýǵa bolady.

Jumyssyz retinde tirkelý týraly málimetter bolǵan kezde Eńbekmıniniń aqparattyq júıesi proaktıvti formatta MÁSQ-tan tólemdi taǵaıyndaý boıynsha qyzmet kórsetýge kelisý úshin mobıldi telefonǵa SMS-habarlama jiberedi. Kelisken jaǵdaıda SMS-habarlamaǵa jaýap berý qajet. Tólem avtomatty túrde taǵaıyndalady», - delingen vedomstvo habarlamasynda.

MÁSQ qarajaty esebinen jumystan aıyrylǵan jaǵdaıda tólenetin áleýmettik tólem jumystan shyǵý sebepterine qaramastan júzege asyrylady jáne jumyssyz adamdy ol jumys izdegen kezeńde qoldaýǵa arnalǵanyn esterińizge sala keteıik.

Memleket Basshysynyń bıylǵy 1 qyrkúıektegi Joldaýyn iske asyrý úshin 2023 jylǵy 1 qańtardan bastap tabysty almastyrý koeffıtsıentin 40%-dan 45%-ǵa deıin ulǵaıtyldy. Bul rette tólem taǵaıyndaý tártibi saqtaldy jáne jumysynan aıyrylǵan jáne jumyssyz mártebesin alǵan júıege qatysýshylarǵa ǵana qoldanylady.

Jumysynan aırylý boıynsha áleýmettik tólem mólsheriniń ósýi 2023 jylǵy 1 qańtardaǵy jaǵdaı boıynsha jumys istep turǵan alýshylarǵa da áser etti, ol avtomatty túrde júrgizildi.

Budan buryn habarlanǵandaı, Eńbek jáne halyqty áleýmettik qorǵaý mınıstrligi Elektrondyq eńbek bırjasy arqyly halyqty jumyspen qamtý ortalyqtarynyń qashyqtyqtan qyzmet kórsetý fýnktsıonalyn iske qosty.

Bul jumyssyzdardy tirkeý jáne azamattardyń jumyspen qamtýdy qoldaý boıynsha memlekettik kórsetiletin qyzmetterdi, onyń ishinde jumysynan aıyrylý boıynsha áleýmettik tólemderdi alý rásimderin jeńildetýge múmkindik berdi. Endi barlyǵyn tek ınternet, kompıýter jáne elektrondyq tsıfrlyq qoltańba arqyly ǵana jasaýǵa bolady.