Jumysy tıimsiz dep baǵalanǵan qyzmetshilerdiń laýazymy tómendetiledi - agenttik

ASTANA. QazAqparat – Eki toqsan boıy tıimsiz dep baǵalanǵan qyzmetshilerdiń laýazymy tómendetiledi. Bul týraly Memlekettik qyzmet isteri agenttiginiń tóraǵasy Darhan Jazyqbaev aıtty, dep habarlaıdy QazAqparat tilshisi

Memleket basshysy memlekettik qyzmetke kirýde artyq kedergilerdi joıý jáne memlekettik qyzmetten shyǵý tártibin jeńildetýdi tapsyrǵan bolatyn. Osyǵan baılanysty zańǵa ózgerister engizildi. Birinshiden, memlekettik grantpen oqý oryndaryn aıaqtaǵan túlekterimiz aýdan men aýylda tómengi laýazymdarǵa konkýrstyq irikteýsiz tikeleı taǵaıyndalatyn bolady. Bul bilikti jastardy memlekettik qyzmetke yntalandyrýǵa, jas mamandardyń aýdan men aýyldyq aımaqtarǵa oralýyna, sonymen qatar óńirlerdegi kadr tapshylyǵyn azaıtýǵa septigin tıgizip, memlekettik qyzmetke kirýdi jeńildetedi. Bul zań qabyldandy. Bıyl bitiretin túlekterimiz osy qaǵıdamen jumysqa ornalasady», - dedi ol agenttiktiń keńeıtilgen alqa otyrysynda.

Onyń atap ótýinshe, ekinshiden «B» korpýsynyń joǵary laýazymdaryna ýákiletti organnyń kelisimimen konkýrstyq irikteýsiz tikeleı taǵaıyndaý múmkindigi berilip otyr. Bul birinshi basshylardyń óz qyzmetshileri úshin jaýapkershiligin arttyrady.

«Úshinshiden, eki toqsan boıy tıimsiz dep baǵalanǵan qyzmetshilerdiń laýazymy tómendetiledi, al tómengi bos laýazym bolmaǵanda – qyzmetten shyǵarylady. Bul memlekettik qyzmetten shyǵý tártibin jeńildetedi», - dedi Darhan Jazyqbaev.