Jumystan bosatylǵan pavlodarlyq sheneýnik sol kúni basqa laýazymǵa taǵaıyndalǵan

PAVLODAR. QazAqparat - Pavlodar oblysynda sybaılas jemqorlyqqa qarsy qyzmet aýdan, aýyldarda eńbek etetin 10 memlekettik qyzmetkerdi tártiptik jazaǵa tartty, dep habarlaıdy QazAqparat tilshisi.

«Atalǵan isterdi qaraý qorytyndysynan keıin etıka boıynsha keńes músheleri komıssııanyń tórt múshesine qyzmetke tolyq sáıkes kelmeıtini týraly tártiptik jaza berýge, jer komıssııasynyń sheshimine aralasý deńgeıine baılanysty komıssııanyń bes múshesine qatań eskertý berýge keńes berdi», - dep habarlady Memlekettik qyzmet isteri jáne sybaılas jemqorlyqqa qarsy is-qımyl agenttiginiń Pavlodar oblysy boıynsha departamentinen.

Keńes músheleriniń qaraýyna, sonymen qatar, Sharbaqty aýdanynda jer telimderin berý boıynsha konkýrs komıssııasynyń múshelerine qatysty tártiptik is kelip tústi.

«Erejege sáıkes, konkýrsqa qatysýshylardy tirkeý konkýrstyń ótetini týraly habarlandyrý jarııalanǵannan keıin, konkýrs bastalǵanǵa deıin úsh kún ishinde júrgiziledi. Osyǵan qaramastan, komıssııa músheleri keıbir jeke jáne zańdy tulǵalardyń ótinimin ýaqyt ótip ketkennen keıin de qabyldaǵan», - dep habarlady departamentten. 

Osydan keıin konkýrstyq komıssııa ótinimderdiń durys-burystyǵyn tekserýi kerek. Biraq, jer komıssııasy erejeniń buzylýyna jol bere otyryp, konvertterdi ashý kezinde ýaqyty ótip ketse de, ótinim bergen adamdardyń ótinimin keri qaıtarmaǵan. Konkýrs qorytyndysy boıynsha álgi qatysýshylar jeńimpaz bolyp shyǵa kelgen. Konkýrstyq protsedýralardyń buzylýy boıynsha osyǵan uqsas jaǵdaılar az emes.

«Sol sekildi Baıanaýyl aýdany veterınarııa bóliminiń basshysy óz qalaýymen jumystan shyǵyp ketken. Osy kezde aýdan ákiminiń buıryǵymen dál sol bólimniń bas mamany atalmysh bólim basshysynyń mindetin atqarýshy bolyp taǵaıyndalǵan. Al sol bólim basshysy bolyp kelgen adam - óz qalaýymen jumystan ketip qalǵan burynǵy bólim basshysyn birden «Baıanaýyl aýdanynyń veterınarlyq sharýashylyǵy» KMM basshylyǵyna taǵaıyndaǵan. Keńes músheleriniń biryńǵaı sheshimimen Baıanaýyl aýdanynyń veterınarııa bóliminiń basshysy mindetin atqarýshyǵa qyzmetke tolyq sáıkes kelmeıtini týraly tártiptik jaza berýge keńes berildi», - delingen sybaılas jemqorlyqqa qarsy qyzmettiń habarlamasynda.