Jumyssyzdardy tirkeý tártibi ózgertiletin bolady

ASTANA. QazAqparat - Qazaqstanda jumyssyzdardy tirkeý tártibi ózgertiletin bolady. Bul týraly búgin Senattyń Álýmettik-mádenı damý jáne ǵylym komıtetiniń keńeıtilgen otyrysynda Densaýlyq saqtaý jáne áleýmettik damý vıtse-mınıstri Birjan Nurymbetov osylaı málim etti. Komıtet otyrysynda «Jumyspen qamtý týraly» jańa zań jobasy talqylanǵan bolatyn.

«Halyqaralyq tájirıbelerdi eskere otyryp, biz jumyssyzdardy tirkeý tártibin ózgertetin bolamyz. Qazirgi qoldanystaǵy zań boıynsha biz jumyspen qamtý ortalyqtaryna kelgen azamattardy birden esepke alatynbyz. Al jańa zań jobasy boıynsha biz ol azamattardy áýeli «jumys izdeýshi adam» retinde esepke alatyn bolamyz. Sosyn jumyspen qamtý ortalyqtary álgi azamatqa laıyqty jumys ornyn izdeıtin bolady. Egerde laıyqty jumys tabylmasa, on kúnnen keıin ǵana álgi azamat «jumyssyz» statýsyn alyp, tirkeletin bolady», - dedi B. Nurymbetov.

Onyń aıtýynsha, bundaı norma jumyssyzdardy formaldi túrde tirkeýge jol bermeıdi. Sonymen qatar, bul rette eń birinshiden adamnyń jumys tabý nıetine basa nazar aýdarylyp, soǵan qatysty kómekter kórsetiledi.
«Budan bólek, jumys izdep kelgen azamattarǵa kásibı baǵdar berý máseleleri de tolyq qamtylyp otyr. Ol azamattardyń otbasynyń árbir múshesiniń tabysy belgilengen kedeılik sheginen tómen bolsa, onda olar ataýly áleýmettik kómek alatyn bolady. Bunymen birge, jańa zańǵa sáıkes, resmı jumyssyz retinde tirkelgenderge mindetti áleýmettik-medıtsınalyq saqtandyrý júıesine jarnalardy memleket aýdaratyn bolady», - dedi vıtse-mınıstr.