Jumyssyzdar qysqa ýaqyttyń ishinde ózine qajetti qyzmetti taba alady
QR Eńbek jáne xalyqty áleýmettik qorǵaý vıtse-mınıstri Birjan Nurymbetovtyń aıtýynsha, xalyqty jumyspen qamtý sharalaryna jeke menshik agenttikterdi de tartý josparlanǵan. "Máselen, elimizde 60-tan astam jeke menshik jumyspen qamtý agenttikteri bar. Al ákimdikterdiń janynda 198 memlekettik jumyspen qamtý ortalyǵy qyzmet kórsetedi. Qazirgi kezde atalǵan ortalyqtar men agenttikter arasynda baılanys joq. Biz bolsaq, jumys izdep júrgen azamatqa barlyq aqparatty bir jerden berýdi kózdeımiz. Sol sebepti jeke menshik agenttikterdi de tartyp jatyrmyz", - deıdi Nurymbetov.
Onyń aıtýynsha, qazirgi kezde jumyspen qamtý úshin qurylǵan elektrondy portaldarda adamdar óz túıindemelerin jarııalasa, jumys berýshiler bos oryndar jaıynda xabarlaıdy. Biraq ekijaqty baılanystyrý jaǵy aqsap tur. Oǵan qosa, jumys berýshiler bos jumys oryndary týraly málimetti jarııalaýǵa asyqpaıdy. Bolashaqta olar barlyq aqparatty tikeleı portalǵa jibere alady. Al memlekettik jáne jeke menshik jumyspen qamtý ortalyqtary birlesip qyzmet atqarsa, xalyqty jumyspen qamtý sharalary shapshań júre bastaıdy degen boljam bar. "Búginde jeke menshik agenttikter kásibı baǵdarlaý, ıaǵnı adamnyń mamandyǵyna qaraı jumys taýyp berý qyzmetin jaqsy júrgizedi. Biz osyny aýtsorsıngke berýge daıynbyz. Sol úshin aqsha da tóleımiz", - dep atap kórsetti vıtse-mınıstr búgin Astanada ótken vedomstvoaralyq komıssııanyń otyrysynan keıingi baspasóz máslıxatynda.
Aıta keteıik, eńbek jáne xalyqty áleýmettik qorǵaý mınıstrligi osy saladaǵy jumyspen qamtý sharalaryn www.enbek.kz portaly arqyly júrgizýdi kózdeıdi. Vıtse-mınıstrdiń sózine qaraǵanda, qyrkúıek aıyna deıin málimetter bazalaryn qosý jáne taǵy basqa texnıkalyq jumystar atqarylyp, portaldy jańasha iske qosý josparlanyp otyr. Sóıtip, elimizde biryńǵaı elektrondy eńbek bırjasy qurylady.