Jumyssyz jastarǵa arnalǵan taǵy bir joba kópshilikke jol tartty

NUR-SULTAN. QazAqparat – «Jumys pen bilimnen shet qalǵan jastardy (NEET sanat) áleýmettendirý sharalaryn daıyndaý jáne iske asyrý» atty joba kópshilikke jol tartty, dep habarlaıdy QazAqparat tilshisi.

Bul týraly Nur Otan partııasy «Jas Otan» jastar qanaty tóraǵasynyń orynbasary Aıgerim Serikjanova onlaın rejımde ótken baspasóz máslıhatynda aıtty.

«Joba aıasynda Nur Otan partııasy ortalyq apparatynyń keńsesinde respýblıkalyq jobalyq keńse ashyldy. Onda jastar quqyqtyq, psıhologııalyq máseleler boıynsha jáne basqa da problemalar boıynsha onlaın rejımde keńes ala alady. Sol úshin call-ortalyq jumys isteıtin bolady. Jobany sapaly iske asyrý úshin respýblıkanyń 17 óńirimen tyǵyz yntymaqtastyq týraly memorandým jasalady. Biz NEET sanatyndaǵy jastardyń ómirin jaqsartýǵa jáne kásibı jetilýine, olardy jumysqa ornalastyrýǵa, sportqa tartýǵa baǵyttalǵan túrli is-sharalar ótkizip, semınarlar men trenıngter uıymdastyramyz», - dedi Aıgerim Serikjanova.

Onyń aıtýynsha, jobany iske asyrýǵa qatysqysy keletin barlyq sanattaǵy jastar barlyq aqparatty Batys Qazaqstan oblysyndaǵy jobalyq keńseniń jáne «Bolashaq» korporatıvtik qorynyń áleýmettik jelidegi paraqshalarynan bile alady.

Jobany «Bolashaq» korporatıvtik qory men «Jas Otan» jastar qanatynyń ókilderi «Azamattyq bastamalardy qoldaý ortalyǵynyń» memlekettik granty aıasynda Aqparat jáne qoǵamdyq damý mınıstrliginiń qoldaýymen qolǵa alyp otyr.