Jumyssyz qazaqstandyqtar quny 400 dollarlyq kýrsty tegin oqıdy
«QR Eńbek jáne halyqty áleýmettik qorǵaý mınıstrligi tótenshe jaǵdaı rejıminiń engizilgenine baılanysty Coursera jappaı onlaın bilim berý platformasymen kelisimge kelip, Halyqty jumyspen qamtý ortalyqtarynda esepte turǵan jumyssyzdar úshin qajetti daǵdylar men mamandyqtar boıynsha onlaın-rejımde kýrstardan ótý múmkindigine qol jetkizdi. Aqyly negizde bir kýrs boıynsha oqytý shamamen 400 AQSh dollary turady. Alaıda qol jetkizilgen kelisim aıasynda jumyssyz qazaqstandyqtarǵa bul múmkindik tegin beriledi», - delingen atalǵan mınıstrlik taratqan aqparatta.
vedomstvo málimetinshe, joba aıasynda azamattar 298 kýrs boıynsha bilim ala alady. IT, gýmanıtarlyq ǵylymdar, ekonomıka, fızıka, medıtsına, kásipkerlik, marketıng syndy baǵyttar boıynsha oqýǵa bolady. Kýrstardyń uzaqtyǵy 6-dan 10 aptaǵa deıin sozylady. Kýrstar tapsyrmalardan, aptalyq jattyǵýlardan jáne keıde qorytyndy jobadan nemese emtıhannan turady.
«Pandemııaǵa baılanysty búkil álemde tsıfrlyq tehnologııalar, onyń ishinde onlaın-bilim de keńinen taralýda. Qazaqstandyqtar da olardy belsendi paıdalanýda. Óıtkeni tótenshe jaǵda ı rejımi oflaın ózara is-qımyldy shekteıdi. Sonymen qatar, bul yńǵaıly da. Sebebi kez-kelgen ýaqytta jáne úıden shyqpaı-aq bilim alýǵa bolady. Biraq, biz úshin otandastarymyzdyń tótenshe jaǵdaı aıaqtalǵannan keıin básekeli jalaqysy bar perspektıvaly jumys tapqany mańyzdy. Bul jerde úmitkerdiń daǵdylary men bilimi mańyzdy ról atqarady. Sondyqtan kelissóz júrgizdik. Nátıjesinde 2020 jyldyń sońyna deıin 50 myń jumyssyz qazaqstandyqty tegin oqytýǵa kelistik», – dedi QR Eńbek jáne halyqty áleýmettik qorǵaý vıtse-mınıstri Narıman Muqyshev.
Jobaǵa qatysý úshin resmı túrde jumyssyz retinde tirkelý jetkilikti. Coursera.org saıtyna tirkelý kezinde enbek.kz-te kórsetilgen elektrondyq poshtanyń meken-jaıyn nemese jumyspen qamtý ortalyǵynda jumyssyz retinde tirkelýdi paıdalaný óte mańyzdy.