Jumyssyz qalǵandardyń áleýmettik tólemderi ósedi

ASTANA. QazAqparat - QR Eńbek jáne xalyqty áleýmettik qorǵaý vıtse-mınıstri Svetlana Jaqypova jumysynan aıyrylǵandarǵa berilgen áleýmettik tólemniń qalaısha ózgeretinin túsindirdi. Atalǵan máseleler mindetti áleýmettik saqtandyrý máseleleri boıynsha keıbir zańnamalyq aktilerge ózgerister engizý týraly zań jobasynda qarastyrylǵan, dep xabarlaıdy QazAqparat tilshisi.

Vıtse-mınıstrdiń aıtýynsha, zań jobasynda jumysynan aıyrylýy boıynsha beriletin áleýmettik tólemdi taǵaıyndaý parametrlerin qaıta qaraldy. Sonyń negizinde kiristi almastyrý koeffıtsentin 30 paıyzdan 40-qa deıin arttyrý, sondaı-aq, áleýmettik tólemniń uzaqtyǵyn júıege qatysý ótiline baılanysty 4 aıdan 6 aıǵa deıin uzartý usynylyp otyr.

«Jańa parametrlerdi qoldanǵan jaǵdaıda júıege qatysý ótili 85 aıdy, ortasha aılyq tabysy 100 myń teńgeni quraıtyn qatysýshy úshin jumysynan aıyrylýy boıynsha áleýmettik tólem 30 000-nan 41 600-teńgege deıin artatyn bolady. Ol qazirgi kórsetkishten 38 paıyzǵa artyq. Bul rette atalǵan tólem 4 aıdyń ornyna qazirgideı 6 aıǵa tólenedi», - dedi S.Jaqypova QR Parlament Májilisinde ótken jıynda.

Aıta keteıik, búgin QR Eńbek jáne xalyqty áleýmettik qorǵaý vıtse-mınıstri Svetlana Jaqypova depýtattarǵa mindetti áleýmettik saqtandyrý máseleleri boıynsha keıbir zańnamalyq aktilerge ózgerister engizý týraly zań jobasyn tanystyrdy. Onyń aıtýynsha, zań jobasyn qabyldaýdyń nátıjesinde eńbek etý qabiletinen, asyraýshysynan jáne jumysynan aıyrylý boıynsha tólemderdiń ortasha mólsheri orta eseppen 30-36 paıyzǵa deıin artady. Halyq mindetti áleýmettik saqtandyrý júıesine kóbirek qatysady. Sóıtip, resmı túrde jumys isteıtin adamdardyń sany artady degen boljam bar.
Vıtse-mınıstr eńbek etý qabiletinen aıyrylýǵa qatysty áleýmettik tólemniń qalaısha ózgeretinin de túsindirdi.