Jumyssyz qalǵandar burynǵy tabysynyń 45% alty aıǵa deıin alyp otyrmaq

ASTANA. QazAqparat – Jumyssyz qalǵan azamattarǵa áleýmettik saqtandyrý júıesine jarna tólegen ýaqytyna sáıkes 6 aıǵa deıin burynǵy tabysynyń 45 paıyzyn tóleý engizilmek. Bul týraly Senattyń jalpy otyrysynda Áleýmettik kodeks jobasy men ilespe zań jobalaryn birinshi oqylymda talqylaý kezinde Eńbek jáne halyqty áleýmettik qorǵaý mınıstri Tamara Dúısenova aıtty, dep habarlaıdy QazAqparat tilshisi.

«Qazirgi saqtandyrý júıesi áleýmettik táýekeldiń 5 túrinen saqtandyrady. Bul – halyqaralyq standarttarǵa jáne naqty ekonomıkalyq jaǵdaılarǵa saı keletin júıe. Sondyqtan, onyń negizi saqtalady. Degenmen, maqsaty ózgeredi. Júıe áleýmettik tólem tóleýge ǵana baǵyttalmaı, eń aldymen, azamattardy formaldi jumys isteýge yntalandyrýdy kózdeıtin bolady», - dedi mınıstr.

Bul rette ol usynylatyn ózgeristerdiń basty trendi birinshiden - júıege memleket, jumys berýshiler men jumyskerlerdiń qatysýy ekendigin atap ótti.

«Ekinshiden - júıege qatysý ýaqyty men áleýmettik tólemder arasyndaǵy baılanysty kúsheıtý, úshinshiden áleýmettik jarnalaryn ýaqytyly aýdaryp otyrǵan jumyskerlerge saqtandyrý qorlarynan áleýmettik tólemder mólsherin kezeń-kezeńimen ulǵaıtý bolmaq. Mysaly jumyssyz qalǵan azamattarǵa áleýmettik saqtandyrý júıesine jarna tólegen ýaqytyna sáıkes 6 aıǵa deıin burynǵy tabysynyń 45 paıyzyn tóleý qarastyrylyp otyr», - dedi Tamara Dúısenova.